پرەزيدەنت توراعالىعىمەن ەلىمىزدىڭ الەۋمەتتىك-ەكونوميكالىق دامۋى جونىندە كەڭەس باستالدى
ۇكىمەت ۇيىندە ءوتىپ جاتقان جيىنعا پرەمەر-مينيستر، پارلامەنت پالاتالارىنىڭ سپيكەرلەرى، پرەزيدەنتكە تىكەلەي ەسەپ بەرەتىن مەملەكەتتىك ورگانداردىڭ باسشىلارى، ۇكىمەت مۇشەلەرى، استانا، الماتى، شىمكەنت قالالارىنىڭ، وبلىستار مەن اۋدانداردىڭ اكىمدەرى، سەنات پەن ماجىلىستەگى پارلامەنتتىك فراكتسيالار مەن كوميتەتتەردىڭ جەتەكشىلەرى، وبلىستىق جانە اۋداندىق ءماسليحاتتاردىڭ ءتوراعالارى قاتىسۋدا.
بۇعان دەيىن مەملەكەت باسشىسى الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە اۋىل شارۋاشىلىعىن دامىتۋ، قوسىمشا قۇنى جوعارى قازاقستاندىق تاۋارلاردى ەكسپورتقا بەلسەندى تۇردە شىعارۋ جۇمىستارىن جانداندىرۋدى تاپسىرعان ەدى.
ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە مەملەكەت باسشىسى قاسىم-جومارت توقايەۆ اتقارۋشى جانە وكىلدى بيلىك اراسىندا ءتيىمدى قارىم-قاتىناس ورناتۋ وتە ماڭىزدى ەكەنىن ايتتى.
«جۋىردا ءماجىلىس جانە ءماسليحات دەپۋتاتتارىنىڭ سايلاۋى ءوتتى. ۇكىمەت قايتا جاساقتالدى. وسىلايشا، اۋقىمدى ساياسي وزگەرىستىڭ العاشقى كەزەڭى اياقتالدى دەۋگە بولادى. ءبىز بيلىك تارماقتارىنىڭ تەپە-تەڭدىگىن ورنىقتىردىق. ەندى ەلىمىزدەگى قوعامدىق-ەكونوميكالىق قاتىناستاردى قايتا قۇرۋىمىز كەرەك. جۇرتشىلىق بۇل رەفورمالارعا زور ءۇمىت ارتىپ وتىر. سوندىقتان، ءبىز ناقتى ءىس-شارالارعا باسا ءمان بەرۋگە ءتيىسپىز»، - دەدى پرەزيدەنت.
مەملەكەت باسشىسى پارلامەنت سەسسياسىنىڭ اشىلۋىندا زاڭنامالىق تۇرعىدان شەشىلۋگە ءتيىس ءبىرقاتار ماسەلەنى اتاپ وتكەنىن ەسكە سالدى.
«ال، بۇگىن الەۋمەتتىك- ەكونوميكالىق سالاداعى ماقسات-مىندەتتەردى ايقىنداپ الۋىمىز كەرەك. ۇكىمەت جانە بارلىق دەڭگەيدەگى اكىمدەر سوعان سۇيەنىپ جۇمىس ىستەيتىن بولادى. وسى باسقوسۋعا ءماسليحاتتاردىڭ وكىلدەرى قاتىسىپ وتىر. بۇل دا - ناقتى ساياسي وزگەرىستەردىڭ نىشانى. اتقارۋشى جانە وكىلدى بيلىك اراسىندا ءتيىمدى قارىم-قاتىناس ورناتۋ وتە ماڭىزدى. قاجەت بولسا، ولار ءبىرىن-ءبىرى تولىقتىرىپ، قولداپ وتىرۋى كەرەك. مۇنىڭ ءبارى مەملەكەتتىك ساياساتتى ءتيىمدى جۇزەگە اسىرۋعا مۇمكىندىك بەرەدى. سونداي-اق، ەل مۇددەسىن ەسكەرە وتىرىپ شەشىم قابىلداۋعا جول اشادى»، - دەدى قاسىم-جومارت توقايەۆ.
