قازاقستاندا ەنەرگيا تيىمدىلىگىن ارتتىرۋ جوسپارى ازىرلەنەدى
پرەزيدەنتكە ەلىمىزدىڭ وتىن-ەنەرگەتيكا كەشەنىنىڭ نەگىزگى دامۋ كورسەتكىشتەرى، جانار-جاعارماي نارىعىن ۇزدىكسىز قامتاماسىز ەتۋ شارالارى، سونداي-اق ءىرى مۇناي-گاز جوبالارىن ودان ءارى دامىتۋ ماسەلەسى تۋرالى باياندالدى.
قاسىم-جومارت توقايەۆقا ىشكى نارىقتى گازبەن قامتاماسىز ەتۋ جانە جالپى گاز سالاسىن دامىتۋ شارالارى جونىندە مالىمەت بەرىلدى. ەنەرگەتيكا ءمينيسترى بيىل قازاقستاندا تاۋارلىق گازدى ۇنەمدەپ تۇتىنۋدى ىنتالاندىرۋ ءۇشىن ەنەرگيا تيىمدىلىگىن ارتتىرۋ جوسپارى ازىرلەنەتىنىن ايتتى.
بۇدان بولەك، مەملەكەت باسشىسىنا گەنەراتسيا سەكتورىنداعى جوبالاردى جۇزەگە اسىرۋ، ەلەكتر ەنەرگياسىنىڭ تاپشىلىعىن جويۋ، ەلەكتر ەنەرگەتيكاسى سالاسىن رەتتەۋ تاسىلدەرىن جەتىلدىرۋ جانە نارىقتى دامىتۋدىڭ جاڭا مودەلىن ەنگىزۋ پەرسپەكتيۆالارى تۋرالى اقپارات بەرىلدى.
كەزدەسۋ سوڭىندا پرەزيدەنت ەلىمىزدىڭ ەنەرگەتيكا ينفراقۇرىلىمىن ودان ءارى جاڭعىرتۋدىڭ، سونداي-اق مۇناي-گاز جوبالارىن ۋاقىتىلى جۇزەگە اسىرۋدىڭ ماڭىزدى ەكەنىنە نازار اۋداردى.
