جاستاردى اسكەرگە قابىلداۋ سالاسىندا پاراقورلىق ءورشىپ بارادى - سەناتور
«قازىر قوعامدا جاستارىمىزدىڭ اسكەري بورىشىن وتەۋگە، اسكەرگە بارۋىنا قاتىستى ءبىراز ماسەلە بار. ەندى ءبىرى اسكەرگە بارىپ جاتسا، ەندى ءبىرى اسكەرگە بارۋدان قورقادى. ءبىز وڭىرلەردەگى ءبىرقاتار جاعدايدى بايقاپ وتىرمىز، ياعني مەديتسينالىق تەكسەرۋ كەزىندە كەيبىر جاستارىمىز اسكەردەن جالتارۋعا تالپىنادى. وسى ورايدا مەدكوميسسياعا پارا ۇسىنىپ، جالتارىپ جاتىر. ارينە، ءبىر جاعىنان ولاردى دا، اتا-انالارىن دا تۇسىنۋگە بولادى. قازىرگى زاماندا 18 جاسقا دەيىن ماپەلەپ وسىرگەن بالاسىن امان-ەسەن اسكەرگە جىبەرىپ، ودان كەيىن ونى مۇگەدەك كۇيىندە نەمەسە تابىتپەن قارسى الىپ جاتسا، كىمگە جاقسى؟! مەنىڭ ويىمشا، ءبىز اسكەردەگى تارتىپسىزدىكتى رەتتەمەي، پاراقورلىقتى كوبەيتىپ جاتىرمىز»، - دەدى گ. شيپوۆسكيح سەناتتا اسكەري قىزمەتشىلەردىڭ دەنساۋلىعىنا قاتىستى ماسەلەنى تالقالاۋ كەزىندە.
ءوز كەزەگىندە باس اسكەري پروكۋروردىڭ ءبىرىنشى ورىنباسارى ماقسات قازيەۆ اسكەردە كومانديرلەر جاقسى تاربيە بەرىپ، وزدەرىن ۇلگى رەتىندە كورسەتۋى ءار ساربازعا ۇلكەن قولداۋ بولاتىنىن ايتتى.
«قورعانىس مينيسترلىگىنە توقتالسام، جىل سايىن كوماندير 720 قۇجات تولتىرۋى كەرەك. وسى ورايدا ساربازدارعا قاراپ، پسيحولوگيالىق تۇرعىدا نەمەسە باسشى رەتىندە كومەگىن قالاي كورسەتەدى؟ كۇنى بويى قاعاز تولتىرۋمەن جۇرەدى. سوندىقتان وسى ماسەلەنى كوتەردىك. قازىرگى كەزدە ۆەدومستۆولار بۇل قۇجاتتاردى ازايتىپ، تەك ناقتى قۇجاتتاردى عانا قالدىرىپ جاتىر. سونىمەن قاتار باسقا دا جوسپارلاردى پىسىقتاپ جاتىرمىز» ، - دەدى م. قازيەۆ.
بۇل تۇرعىدا سەناتور گەننادي شيپوۆسكيح اسكەردەگى كەمشىلىكتەردى جويۋ ءۇشىن قاتاڭ شەشىمدەر بولۋى كەرەك ەكەنىن اتاپ ءوتتى.
«ەگەر وڭىردە وسىنداي جاعداي بولسا، ءبىر سارباز مەرت بولسا نەمەسە مۇگەدەك بولسا، ءدال سول جەردەگى ايماقتىق بولىمشەلەردىڭ ءبىرىنشى باسشىلارىن مىندەتتى تۇردە قاتاڭ جاۋاپقا تارتۋ كەرەك. ءتىپتى، تريبۋنالعا جىبەرۋ كەرەك. سوندا عانا ءتارتىپ ورنايدى»، - دەدى دەپۋتات.
