گازدى دۇرىس قولدانباۋ قايعىلى جاعدايعا سەبەپ بولادى: ت ج م تۇرعىندارعا قاتاڭ ەسكەرتۋ جاسادى

استانا. قازاقپارات - استانا. قازاقپارات – ق ر توتەنشە جاعدايلار مينيسترلىگى تۇرعىندارعا گازدى تۇتىنۋ جانە ونىڭ قاۋىپسىزدىگىمەن بايلانىستى ەسكەرتۋ جاسادى، دەپ حابارلايدى قازاقپارات.

«گاز اسپاپتارى ءبىزدىڭ تۇرمىسىمىزدىڭ اجىراماس بولىگى. ءبىراق، ونى دۇرىس قولدانباۋدىڭ سالدارىنان ءورت جانە جارىلىس سياقتى قايعىلى جاعدايلار بولىپ جاتادى. بۇل تۋرالى قالىڭ كوپشىلىك بىلمەيدى ەمەس، بىلەدى. الايدا سوعان جەتكىلىكتى ءمان بەرمەي جاتادى نەمەسە نەمقۇرايدىلىق تانىتادى. ادامدار كۇندەلىكتى كۇيبەڭ تىرشىلىك پەن دۇنيە تابام دەپ ءجۇرىپ، ۇيدەگى تابان اقى، ماڭداي تەرمەن تاپقان دۇنيەسىنەن ايىرىلىپ قالۋى مۇمكىن ەكەندىگىن ەستەن شىعارىپ الىپ جاتادى. ەڭ قورقىنىشتىسى توتەنشە جاعدايلاردىڭ سالدارىنان بالا-شاعا، جاقىندارىنان دا اجىراپ قالاتىن جاعدايلار بولادى.

وكىنىشكە قاراي، قازىرگى تاڭدا پايدا تابۋ ءۇشىن گاز باللوندارىن زاڭسىز ساۋدالاۋمەن اينالىساتىندار كوبەيىپ كەتتى. وسىعان ساق بولۋ كەرەك. سونىمەن قاتار بالوندى ساقتاۋ تالاپتارى دا نازاردان تىس قالىپ جاتادى. ايتالىق ولاردى كۇن كوزى تيەتىن اشىق جەردە قالدىرماۋ، وتقا جاقىن جەردەن اۋلاق قويۋ سياقتى قاۋىپسىزدىك ەرەجەلەرىن نازاردان تىس قالدىرماعان ءجون. مۇنداي جاعدايدا باللونداعى سۇيىتىلعان گازدىڭ اۋامەن قوسىلىپ جارىلىسقا قاۋىپتى قوسپانى تۇزەيتىنىن ەستەن شىعارماعان ءجون. قۇبىردىڭ اقاۋىنان نەمەسە تۇرعىنداردىڭ سالعىرتتىعىنان بولمەگە ەنگەن گاز دا وتە قاۋىپتى. ول جارىلۋعا بەيىم تۇرادى. بۇل ءۇشىن جانۋ كوزىنىڭ - سىرىڭە نەمەسە ەلەكتر جارىعىنىڭ ۇشقىنى جەتكىلىكتى»، - دەلىنگەن حابارلامادا.

سونداي-اق وندا قازىرگى تاڭدا ءورت ءسوندىرۋ قىزمەتكەرلەرىنىڭ قاۋىپسىزدىك بويىنشا وقىتۋ جانە ءورتتىڭ الدىن الۋ جۇمىستارىن جۇرگىزىپ جاتقانى ايتىلادى. بۇل باعىتتاعى بۇقارالىق اقپارات قۇرالدارى، جەرگىلىكتى پوليتسيا، «قازترانسگازايماق» ا ق ج ءو ف، جەرگىلىكتى اتقارۋشى ورگاندار وكىلدەرى جانە ۆولونتەرلاردى قاتىستىرا وتىرىپ ءورت قاۋىپسىزدىگى سەنبىلىگى جانە ءارتۇرلى ءورت قاۋىپسىزدىگى اكتسيالارى ۇيىمداستىرىلىپ جاىر.

«ءورتتىڭ الدىن الۋ جانە جول بەرمەۋ جۇمىستارى تۇرعىنداردىڭ ءورت قاۋىپسىزدىگىنە مۇقيات بولىپ، ورتكە قارسى قورعانىستى كۇشەيتۋگە مۇمكىندىك بەرەدى دەپ ۇمىتتەنەمىز»، - دەلىنگەن جامبىل وبلىستىق توتەنشە جاعدايلار دەپارتامەنتى تاراتقان اقپاراتتا.

تۇرمىستىق گازدان كەلەتىن جارىلىستارعا جول بەرمەۋ ماقساتىندا گاز اسپاپتارىن قولدانۋ جانە كۇتىم جاساۋ كەزىندەگى ءورت قاۋىپسىزدىگى ەرەجەلەرىن ءبىلۋ قاجەت:

- گاز باللوندارىن كوپ قاباتتى (2 قاباتتان جوعارى) تۇرعىن ۇيلەردە قولدانۋعا تىيىم سالىنادى؛

- گاز اسپاپتارىن وزدىگىنەن جوندەۋ جۇمىستارىن جۇرگىزۋگە بولمايدى؛

- گاز قۇبارلارىنىڭ اقاۋىن وزدەرىڭىز جوندەمەڭىزدەر!.

- باللوندى اۋىستىرۋ كەزىندە، جاڭا جانە قولدانىلعان باللونداردىڭ كراندارى جابىق ەكەندىگىنە كوزدەرىڭىزدى جەتكىزىڭىزدەر. اۋىستىرعاننىن كەيىن ونىڭ گەرمەتيۆتىلىگىن (سابىندى كوبىكتىڭ كومەگىمەن) تەكسەرىڭىزدەر؛

- ەلەكتر قوندىرعىلارىنىڭ، جانىپ جاتقان پەشتىڭ، اشىق وتتىڭ جانىندا گاز باللونىن اۋىستىرماڭىزدار؛

- پاتەرلەردە جانە تۇرعىن ۇيلەردە قولدانىلاتىن گاز باللونىنىڭ كولەمى 12 ليتردەن اسپاۋى كەرەك.

- باللونداردى ساقتايتىن قويمالار ءبىر قاباتتى تەز اشىلاتىن، شاتىرى جوق عيماراتتاردا ساقتالۋى ءتيىس؛

- باللوندار ساقتالاتىن بولمەدەگى تەرەزەلەر اق بوياۋمەن بويالۋى نەمەسە كۇننەن قورعايتىن قوندىرعىلارمەن جابدىقتالۋى ءتيىس؛

- گاز باللوندار كۇن نۇرىنان جانە جاۋىن شاشىننان قورعالۋى ءتيىس؛

- گاز ساقتالعان قويمادا باسقا قوندىرعىلار مەن ماتەريالداردىڭ ساقتالۋىنا جول بەرىلمەيدى؛

- گاز ساقتالعان قويما تابيعي جەلدەتىلەتىن بولۋى ءتيىس؛

- باشماكتارى بار گاز باللوندار، تىگىنەن قۇلاۋعا جول بەرمەيتىن ارنايى ۇياشىقتاردا، كلەتكالاردا نەمەسە باسقا دا قوندىرعىلاردا ساقتالۋى قاجەت. باشماكتارى جوق باللوندار تىگىنەن رامالاردا نەمەسە ستەللاجداردا ساقتالادى.

- گازدىڭ شىعۋىنىنا جول بەرمەۋ ءۇشىن تاماق ازىرلەۋ كەزىندە، قايناپ جاتقان سۇيىقتىقتاردى وتقا توگىلۋىنە جول بەرمەۋ قاجەت.

- جۇمىس سوڭىندا گاز باللونىن ءسوندىرۋدى ۇمىتپاڭىز؛

- ۇيدەن كەتەر كەزدە گاز پليتانى ءسوندىرۋ جانە باللون كرانىن جابۋدى ۇمىتپاڭىزدار؛

- گاز ءيىسىن انىقتاعان جاعدايدا باللون كرانىن جاۋىپ گاز بەرۋدى توقتاتۋ قاجەت، تەز ارادا ەسىك تەرەزەنى اشىپ بولمەنى جەلدەتۋ، اشىق وتتى پايدالانباۋ، ەلەكتر اسپاپتارىن ءسوندىرىپ تاستاۋ قاجەت جانە تەلەفون سىمىن روزەتكادان اجىراتۋ جانە گاز قىزمەتى ماماندارىن «104» تەلەفونى ارقىلى شاقىرۋ قاجەت؛

- قاجەت بولعان جاعدايدا بولمەدەن شىعۋ جانە كورشىلەرگە بۇل جونىندە حابارلاۋ قاجەت.

ورتكە قارسى ەرەجەلەردى مەڭگەرۋ - بۇل تۇرمىستا جانە وندىرىستە ءورتتىڭ ورىن الۋ مۇمكىندىگىن ازايتۋ كەپىلى.

ايتا كەتەيىك، 17-ءساۋىر كۇنى ساعات 5 شاماسىندا جاڭاوزەن قالاسىندا ەكى كىرەبەرىستەن تۇراتىن 12 پاتەرلى 2 قاباتتى تۇرعىن ۇيدە گاز جارىلىپ، 4 ادام مەرت بولدى.