09:38, 18 - ءساۋىر 2023 | GMT +5
ۇشاق بيلەتىن ارزان العان ەر ادام جالعىز جولاۋشى بولىپ شىقتى
استانا. قازاقپارات - بەلفاستان فاراعا ۇشقان ساياحاتشى Jet2 رەيسىنىڭ جالعىز جولاۋشىسى بولىپ شىقتى، - دەپ حابارلايدى Tengritravel.kz ءتىلشىسى The Star باسىلىمىنا سىلتەمە جاساپ.
65 جاستاعى پول ۋيلكينسوننىڭ ايتۋىنشا، ول ۇشاققا وتىرعىزۋ الاڭىندا ادامداردى كورمەگەنىنە تاڭعالادى. جولاۋشىنى قارسى العان بورتسەرىكتەر ونىڭ VIP جولاۋشى ەكەنىن ايتتى، ويتكەنى ول ارزان بيلەت ساتىپ العانىمەن، كەزدەيسوق بوس ۇشاققا وتىردى. بورتسەرىكتەر ادامدى ۇشۋ كەزىندە پاتشا دەپ اتادى جانە ونىڭ بارلىق ءوتىنىشىن ورىنداۋعا تىرىستى.
«بۇل مەنىڭ جەكە ۇشاعىممەن ۇشۋ سياقتى بولدى. بىرەۋ ماعان جەكە ۇشاقتىڭ قۇنى شامامەن 28 مىڭ فۋنت ستەرلينگ ەكەنىن ايتتى. مەنىڭ ويىمشا، مۇنداي جاعداي ەندى ەش قايتالانبايدى»، - دەپ قورىتىندىلادى ۋيلكينسون.
جولاۋشى ۇشاقتا ۇنايتىن ورىندى تاڭداي العانىن، سونداي-اق ۇشار الدىندا ۇشقىشپەن اڭگىمەلەسكەنىن اتاپ ءوتتى.
