سايرامدىقتار ەگىستىكتى قويدىڭ قانى ارالاسقان سۋمەن سۋارۋعا ءماجبۇر - ۆيدەو

تۇركىستان. قازاقپارات - تۇركىستان وبلىسى، سايرام اۋدانىنا قاراستى قارابۇلاق ەلدى مەكەنىندە ەگىستىك القاپتارى قويدىڭ قانى ارالاسقان سۋمەن سۋارىلىپ وتىر، دەپ حابارلايدى قازاقپارات ءتىلشىسى.

الەۋمەتتىك جەلىدە قارابۇلاق تۇرعىندارىنىڭ جانايقايى جاريالاندى. ولاردىڭ ايتۋىنشا قويدىڭ قان قالدىقتارىن كەز كەلگەن جەرگە توگىپ كەتەتىن قاساپشىلاردىڭ ارەكەتىنەن ەل زارداپ شەگىپ وتىر. سونىڭ سالدارىنان اۋىل ىشىندەگى ارىق سۋلارى قىزارىپ كەتكەن. ال ول سۋدى جەرگىلىكتى تۇرعىندار ەگىستىككە پايدالانۋعا ءماجبۇر.

تابيعات جاناشىرى عاني نازاربەك بۇل ماسەلەگە بەي-جاي قاراۋعا بولمايتىنىن جەتكىزدى.

«تۇركىستان وبلىسى سايرام اۋدانى اۋماعىندا ەپيدەميولوگيالىق جاعدايعا تالداۋ جۇرگىزۋ قاجەت. اۋدان اۋماعىندا كوپتەگەن بوينيالار بار. ول جەرلەردە كۇندەلىكتى مىڭداعان باس مال سويىلىپ جاتىر. ال ولاردان شىققان قالدىقتاردى وڭدەۋ، زالالسىزداندىرۋ ورىندارى جوق. قالدىقتاردى (تەرى، باس- سيراق، قان، ىشكى ورگاندار) رۇقسات ەتىلمەگەن جەرلەرگە تاستاپ جاتىر. ونداي ورىندار كۇن سايىن كوبەيىپ كەلەدى. مىڭداعان توننا قان جەراستى سۋلارىنا قوسىلۋدا، باسقا قالدىقتار اشىق دالادا ساسىپ جاتىر»، - دەيدى ول.

ال سايرام اۋدانى اكىمدىگىنىڭ باسپا ءسوز قىزمەتى بۇگىن اۋدان اكىمىنىڭ ورىنباسارى م. ورازاليەۆ قارابۇلاق اۋىلدىق وكرۋگىنە بارىپ، تۇرعىندارمەن كەزدەسكەنىنىن ايتتى.

«سايرام اۋدانى اقسۋكەنت اۋىلىنىڭ تازارتقىش عيماراتتارىن قايتا قۇرۋ» نىسانى تۋرالى ءمان-جاي مەن وسى نىساننىڭ سىرتقى اۋماقتارىندا سانيتارلىق تالاپتاردى ساقتاۋ كەرەكتىگى ءتۇسىندىرىلدى. سونداي-اق ءتارتىپتىڭ ساقتالۋىن قاداعالاۋ ءۇشىن اۋداندىق پوليتسيا باسقارماسىنىڭ قىزمەتكەرلەرى بۇگىننەن باستاپ تاۋلىكتىك كەزەكشىلىككە تۇسەتىن بولادى. تۇرعىنداردىڭ شۇڭقىر قازۋ جانە جولداردى اشۋ تۋرالى ءوتىنىشى نازارعا الىندى. بۇل باعىتتا ارنايى تەحنيكالاردىڭ كومەگىمەن جۇمىس جۇرگىزىلەتىنى تۋرالى كەلىسىمگە كەلدى»، - دەلىنگەن اقپاراتتا.

سونداي-اق بۇگىن اۋداندىق ءماسليحات دەپۋتاتتارى مەن سالا ماماندارى دا قارابۇلاق اۋىلىنىڭ تۇرعىندارىمەن كەزدەسكەن.

ناتيجەسىندە، اۋداندىق تۇرعىن ءۇي- كوممۋنالدىق شارۋاشىلىق ءبولىمى مەن «سايرام تازالىق» ج ش س تاراپىنان ارنايى تەحنيكا ءبولىنىپ، شايىندى سۋلار جينالاتىن ورىندار تازالاناتىن بولدى.

سونىمەن قاتار اۋداندىق ءماسليحات تاراپىنان قۇزىرلى ورگاندارعا ورىن العان كەمشىلىكتەردى جويۋعا جانە كىنالى ازاماتتاردى جاۋاپكەرشىلىككە تارتۋ تۋرالى ۇسىنىسحات تا جولداندى.