ارىستانبەك مۇحامەدي ۇلى مەن سىبايلاستارىنا قانداي ايىپ تاعىلىپ وتىر

استانا. قازاقپارات - ۇلتتىق مۋزەيدىڭ بۇرىنعى باسشىسى ارىستانبەك مۇحامەدي ۇلى مەن ونى قاسىنداعى فيگۋرانتتارعا قانداي ايىپ تاعىلىپ وتىرعانى بەلگىلى بولدى، دەپ حابارلايدى قازاقپارات ءتىلشىسى.

«فيگۋرانتتار قىلمىستىق ارەكەتكە بارىپ 2020-جىلدىڭ اقپان ايىنان جەلتوقسانعا دەيىن قارجى جىمقىرعان. «دامۋ» اۋديتورلىق كومپانياسىنىڭ 2022-جىلعى 27- شىلدەدەگى ەسەبىنە سايكەس، «ەكسپونات» ج ش س جۇمىستى ناقتى ورىنداپ، قىزمەت كورسەتۋ مەن تاۋارلاردى تيەپ-جونەلتۋدىڭ ورنىنا 221 ميلليون 411 مىڭ 730 تەڭگە سوماسىندا شىعىن كەلتىرگەن»، - دەدى سوت بارىسىندا پروكۋرور ەركەعالي زاكىروۆ.

ونىڭ ايتۋىنشا، ا. مۇحامەدي ۇلى ا. نۇرازحان، ا. كوشەنوۆ جانە ا. ءسادۋاقاسوۆانىڭ كومەگىمەن بيۋجەت قارجىسىن قولدى ەتكەن.

«وسىلايشا، ا. مۇحامەدي ۇلى قىلمىستىق كودەكستىڭ 28-بابى 3-بولىگىنىڭ، 189-بابى 4-بولىگىنىڭ 2-تارماعىنا سايكەس قاساقانا قىلمىستىق قۇقىق بۇزۋشىلىقتار جاسادى. ياعني قىلمىس ۇيىمداستىردى، بوگدەنىڭ مۇلكىن جىمقىرىپ، قىزمەتتىك جاعدايىن پايدالانا وتىرىپ، ادامدارمەن الدىن الا ءسوز بايلاسۋ ارقىلى ءىرى مولشەردە قارجى جىمقىردى»، - دەيدى ول.

سونداي-اق، پروكۋرور ا. مۇحامەدي ۇلىنىڭ ءسوز بايلاسقان ادامدارى، اتاپ ايتقاندا، الماز نۇرازحان، ازامات كوشەنوۆ جانە ايىم ءسادۋاقاسوۆاعا دا جوعارىداعىداي ايىپ تاعىلىپ وتىرعانىن جەتكىزدى.

«ولار قىلمىستىق كودەكستىڭ 28-بابى 5-بولىگى جانە 189-بابى 4-بولىگى 2-تارماعىنا سايكەس جىمقىرۋ ارقىلى بوتەننىڭ مۇلكىن ۇرلاۋعا جاردەمدەسۋ، الدىن الا ءسوز بايلاسۋ ارقىلى ءبىر توپ اداممەن بىرگە اسا ءىرى مولشەردە قارجى جىمقىرۋ بويىنشا ايىپتالىپ وتىر»، - دەيدى ەركەعالي زاكىروۆ.

ءوز كەزەگىندە ايىپتالۋشى ارىستانبەك مۇحامەدي ۇلى ءوز كىناسىن مويىندامادى.

بۇعان دەيىن سوتتىڭ ۇلتتىق مۋزەيدىڭ بۇرىنعى باسشىسىن ءۇي قاماققا اۋىستىرۋدان باس تارتقانىن حابارلاعان ەدىك.