قىتايلىقتار قازاقستاندا قالىپ قويادى دەۋگە ەش نەگىز جوق – س ءى م ۆيزاسىز رەجيم جايلى

استانا. قازاقپارات - سىرتقى ىستەر مينيسترلىگى ەلىمىز بەن قىتاي اراسىندا ورناۋى مۇمكىن ۆيزاسىز رەجيمگە تۇسىنىك بەردى، دەپ حابارلايدى قازاقپارات ءتىلشىسى.

«ازىرگە بۇل كەلىسىم تەك پىسىقتالىپ جاتىر. ءبىز ونى قوعامدىق تالقىعا شىعاردىق. ءبىراق كەيبىر ب ا ق بۇل كەلىسىمگە ەندىگى قول قويىلىپ قويعانداي ەتىپ جازدى»، - دەدى مينيسترلىكتىڭ رەسمي وكىلى ايبەك سمادياروۆ ب ا ق وكىلدەرىمەن وتكەن بريفينگىدە.

ونىڭ ايتۋىنشا، اتالعان كەلىسىم ءالى كوپشىلىك تالقىسىندا جانە كۇشىنە ەنبەگەن.

«قازاقستاندا قىتايلىقتار قالىپ قويۋى مۇمكىن دەپ پايىم جاساۋعا ەش نەگىز جوق. بۇل رەتتە ق ح ر ازاماتتارىنىڭ قازاقستاندا 2022-جىلعى ماۋسىمنان باستاپ ۆيزاسىز ءجۇرىپ-تۇرۋىنا قۇقىعى بار ەكەنىن اتاپ وتكىم كەلەدى. ولار 14 كۇن ۆيزاسىز جۇرە الادى. كورىپ وتىرعانىڭىزداي، قىتايلىقتار كوپتەپ كەلىپ جاتقان جوق جانە جۇمىس ورىندارىندا تاپشىلىق تۋىندايتىنداي سەبەپ جوق. ءبىز ولارعا ون ءتورت جانە وتىز كۇنگە شەكارانى اشتىق»، - دەپ ءتۇسىندىردى ايبەك سمادياروۆ.

رەسمي وكىلدىڭ ايتۋىنشا، بۇل ەل ەكونوميكاسىنا قوسىمشا قارجى تارتۋعا جانە قازاقستاندىقتار ءۇشىن جاڭا جۇمىس ورىندارىن قۇرۋعا سەپتىگىن تيگىزبەك.

«قازاقستان ۇكىمەتى داعدارىسقا قارسى شارالار شەڭبەرىندە قولايلى ينۆەستيتسيالىق احۋال جاساۋعا، ىسكەرلىك بايلانىستاردى جانداندىرۋعا جانە ەلدىڭ تۋريستىك الەۋەتىن ارتتىرۋعا مۇمكىندىك بەرەتىن ۆيزالىق راسىمدەر مەن رەجيمدەردى زاڭداستىرۋ جونىندە قادام جاساپ جاتىر. وسى رەتتە بۇل ەلىمىزدىڭ ەكونوميكاسىنا قوسىمشا قارجى تارتۋعا جانە ازاماتتارىمىز ءۇشىن جاڭا جۇمىس ورىندارىن قۇرۋعا ىقپال ەتپەك»، - دەپ تۇيىندەدى مينيسترلىكتىڭ رەسمي وكىلى.