سوتتا ادۆوكات ارىستانبەك مۇحامەدي ۇلىنىڭ جازاسىن ءۇيقاماققا اۋىستىرۋدى سۇرادى

استانا. قازاقپارات - ادۆوكات بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلىن قاماۋدا ۇستاۋ ءتارتىبىن ءۇيقاماققا اۋىستىرۋدى سۇرادى، دەپ حابارلايدى قازاقپارات ءتىلشىسى.

بيىل اقپان ايىندا ق ر ۇلتتىق مۋزەيىنىڭ ەكس-ديرەكتورى ا. مۇحامەدي ۇلىن قاماۋدا ۇستاۋ مەرزىمى 2 ايعا ۇزارتىلعان ەدى.

ايتا كەتەيىك، سوت پروتسەسى بايقوڭىر اۋداندىق №2-سوتىندا قارالىپ جاتىر. ا. مۇحامەدي ۇلى سوت وتىرىسىنا ونلاين رەجيمدە قاتىسىپ وتىر. سەبەبى ەلوردادا قاردىڭ قالىڭ تۇسۋىنە بايلانىستى كۇدىكتى سوت ءوتىپ جاتقان عيماراتقا جەتكىزىلمەدى.

«ادۆوكاتىڭىز قىلمىس قۇرامىنىڭ بولماۋىنا بايلانىستى سىزگە قاتىستى قىلمىستىق ءىستى توقتاتۋ جونىندەگى ماسەلەنى شەشۋ تۋرالى وتىنىشپەن جۇگىندى. سونداي-اق سىزگە قاتىستى بۇلتارتپاۋ شاراسىن ءۇيقاماققا وزگەرتۋدى سۇرادى»، - دەدى سۋديا باعلان ىدىرىسوۆ سوت وتىرىسىندا ا. مۇحامەدي ۇلىنا قاراتا ايتقان سوزىندە.

ءوز كەزەگىندە ق ر ۇلتتىق مۋزەيىنىڭ ەكس-ديرەكتورى وسىعان دەيىن اتالعان ماسەلەگە قاتىستى ءتيىستى ءوتىنىش جاسالعانىن ايتتى.

«ءۇيقاماققا اۋىستىرۋ تۋرالى ءوتىنىش جولداعان ەدىك. جاقىندا ماعان ەكىنشى وپەراتسيا جاسالدى. دەنساۋلىق جاعدايىم ناشارلاپ كەلەدى. وسى ورايدا ءۇيقاماققا اۋىستىرۋ شەشىمى دۇرىس بولار ەدى»، - دەدى ا. مۇحامەدي ۇلى.

سونىمەن قاتار ول بۇل ءىستى قاراۋدى توقتاتۋ كەرەك ەكەنىن ايتتى.

«وتىرىس بارىسىندا ادۆوكاتتار ايتقانداي، ءىس بويىنشا ەشتەڭە دالەلدەنبەدى، بىردە-ءبىر فاكتى جوق. سوعان قاراماستان، ءبىز وسىندا قاماۋدامىز»، - دەدى ا. مۇحامەدي ۇلى.

ەستەرىڭىزگە سالا كەتەيىك، 2022 -جىلدىڭ 28-مامىرىندا سوت سانكتسياسىمەن ۇلتتىق مۋزەي ديرەكتورى ارىستانبەك مۇحامەدي ۇلىنا قاتىستى «كۇزەتپەن ۇستاۋ» بۇلتارتپاۋ شاراسى تاڭدالدى.

تەرگەۋ «التىن ادامنىڭ الەم مۇراجايلارى بويىنشا شەرۋى» حالىقارالىق كورمەسىن وتكىزۋگە، سونداي- اق «قازاقستاننىڭ ۇلتتىق كيەلى نىساندارى مەن مۋزەي قورلارىن جالپىمەملەكەتتىك فوتوگراممەتريالىق 3D- سكانەرلەۋ» جانە «قازاقستان رەسپۋبليكاسىنىڭ ۇلتتىق سيفرلىق كينوكوللەكتسياسىن تسيفرلاندىرۋ» جوبالارىنا بولىنگەن بيۋدجەت قاراجاتىن ۇرلاۋ فاكتىلەرى بويىنشا جۇرگىزىلدى.

بۇدان باسقا، ا. مۇحامەدي ۇلىنىڭ مادەنيەت جانە سپورت ءمينيسترى لاۋازىمىندا بولعان كەزىندە تۋىستارىنىڭ جانە ۇلەستەس تۇلعالارىنىڭ مەنشىگىنە «سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى» ر م ق ك، «قازاق ەنسيكلوپەدياسى» ا ق جانە «قازاق عىلىمي-زەرتتەۋ مادەنيەت ينستيتۋتى» ج ش س زاڭسىز بەرۋگە قاتىستىلىعى تەكسەرىلدى.

تەرگەلگەن قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ميلليارد تەڭگە دەپ باعالاندى.