دەمالىس كۇندەرى استاناعا ايلىق نورمادان اساتىن قار ءتۇستى - اكىمدىك

استانا. قازاقپارات - استانا اكىمدىگىنىڭ باسپا ءسوز قىزمەتى بەرگەن مالىمەت بويىنشا، دەمالىس كۇندەرى قالاعا ايلىق نورمادان اساتىن قار تۇسكەن، - دەپ حابارلايدى قازاقپارات ءتىلشىسى.

«قالانىڭ كوممۋنالدىق قىزمەتتەرى تاۋلىك بويى كۇشەيتىلگەن رەجيمدە جۇمىس ىستەپ جاتىر. «قازگيدرومەت» رمك دەرەكتەرى بويىنشا، قالاداعى جاۋىن- شاشىننىڭ اي سايىنعى نورماسى - 22 م م. ال كەيىنگى ءۇش كۇندە استاناعا 37,6 م م قار ءتۇستى.

بارلىق كوممۋنالدىق قىزمەتتەر كۇشەيتىلگەن جۇمىس رەجيمىنە اۋىستىرىلدى. قار تازالاۋ جۇمىستارىندا كۇن سايىن 2,2 مىڭنان استام جول جۇمىسشىسى، مىڭنان استام ارنايى تەحنيكا تارتىلىپ وتىر»، - دەپ جازىلعان اكىمدىكتىڭ باسپا ءسوز قىزمەتى ۇسىنعان مالىمەتتە.

اكىمدىكتىڭ اقپاراتىنا سۇيەنسەك، ءساۋىردىڭ 16 سىنان 17 سىنە قاراعان ءتۇنى ەلوردا اۋماعىنان 23 مىڭ تەكشە مەتردەن استام نەمەسە 1671 ماشينا قار شىعارىلعان.

«قىس باستالعاننان بۇگىنگە دەيىن قار توگەتىن پوليگوندارعا 4 ميلليون تەكشە مەترگە جۋىق قار شىعارىلدى. بۇل 318 مىڭنان استام رەيس دەگەن ءسوز.

كۇن رايىنىڭ ناشارلاۋىنا بايلانىستى قالادا كولىك قوزعالىسىنىڭ قارقىنى تومەندەدى. توتەنشە جاعدايلاردىڭ الدىن الۋ ءۇشىن جول قوزعالىسىنا قاتىسۋشىلاردان وتە مۇقيات بولۋدى سۇرايمىز»، - دەپ جازادى اكىمدىك وكىلدەرى.

ەسىمجان ناقتىباي