سەرىك جۇمانعارين باستاعان دەلەگاتسيا اۋعانستانعا گۋمانيتارلىق جۇك تاپسىردى - فوتو
اقپاراتقا سۇيەنسەك، كەشە پرەمەر-ءمينيستردىڭ ورىنباسارى - ساۋدا ءمينيسترى سەرىك جۇمانعارين باستاعان قازاقستاندىق دەلەگاتسيا اۋعانستان استاناسى - كابۋل قالاسىنا باردى. وندا اۋعانستان حالقىنا گۋمانيتارلىق كومەكتى تاپسىرۋ سالتاناتتى شاراسى ءوتتى. بۇل مەملەكەت باسشىسى قاسىم- جومارت توقايەۆتىڭ تاپسىرماسىمەن جاسالدى.
«سونىمەن قاتار كابۋلدا قازاقستان جانە اۋعانستان كاسىپكەرلەرىنىڭ كەزدەسۋى ءوتتى. ارنايى ساۋدا بيزنەس- فورۋمى ۇيىمداستىرىلدى. بيزنەسمەندەردىڭ كوڭىل-كۇيىنە قاراعاندا وتە ءساتتى بولعان سياقتى. كاسىپكەرلەردىڭ بولاشاققا ۇلكەن جوسپارلارى بار، جاقىن ارادا اۋعانستاندا قازاقستاننىڭ ساۋدا ءۇيى اشىلادى.
ب ۇ ۇ حالىق قورىنىڭ باعالاۋى بويىنشا اۋعانستان حالقى شامامەن 40 ميلليون ادامدى قۇرايدى. ارينە بۇل ءبىزدىڭ وندىرۋشىلەر ءۇشىن وتە تارتىمدى ءارى قىزىق نارىق. تەك 2022 -جىلدىڭ وزىندە اۋعاندارمەن ەكىجاقتى ساۋدا كولەمى رەكوردتىق كورسەتكىشكە - 987,9 ميلليون دوللارعا جەتتى، بۇل وتكەن جىلمەن سالىستىرعاندا 2,1 ەسە جوعارى.
ساۋدانىڭ ارتۋى، ەڭ الدىمەن، وتاندىق ءونىم ەكسپورتىنىڭ ءوسۋىنىڭ ارقاسىندا بولعان جاعداي. ال بيىل قازاقستاندا وندىرىلگەن تاۋارلاردى ەكسپورتتاۋ ەسەبىنەن 1 ميلليارد دوللاردى ەڭسەرۋ تۋرالى سەنىممەن ايتۋعا بولادى»، - دەپ جازدى ا. سمادياروۆ.
قازاقستان كاسىپكەرلەرى اۋعانستانعا نەگىزىنەن بيداي نەمەسە بيداي- قارا بيداي ۇنى، بيداي، كەپتىرىلگەن بۇرشاق كوكونىستەرى، لەگيرلەنبەگەن بولاتتان جاسالعان جالپاق پروكات، تەمىرجول لوكوموتيۆتەرى، زىعىر تۇقىمدارى مەن كۇنباعىس مايىن ەكسپورتتاپ وتىر.
«حالىقارالىق قاۋىمداستىق اۋعانستانداعى ەكونوميكالىق كۇيرەۋگە، گۋمانيتارلىق داعدارىسقا جول بەرمەۋ كەرەك دەگەن ورتاق تۇسىنىككە يە بولعاندىقتان، ءبىز بۇل ەلمەن ساۋدا- ەكونوميكالىق بايلانىستاردى قالپىنا كەلتىرىپ، دامىتۋىمىز كەرەك. ەكونوميكالىق ىنتىماقتاستىق سالاسىندا، قازاقستان مەن اۋعانستان اراسىنداعى، اسىرەسە ورتالىق جانە وڭتۇستىك ازياداعى ينتەگراتسيالىق ۇدەرىستەر سالاسىنداعى قارىم- قاتىناستاردى دامىتۋ ۆەكتورلارىنىڭ ءبىرى رەتىندە ينفراقۇرىلىمدىق جوبالاردى ىسكە اسىرۋدىڭ ماڭىزدىلىعىن اتاپ وتكەن ءجون»، - دەيدى س ءى م وكىلى.
ايبەك سمادياروۆتىڭ ايتۋىنشا، اۋعاندىقتاردىڭ داستارحانىنداعى قازاق ونىمدەرى ساپا مەن تاماشا ءدامنىڭ بەلگىسى بولىپ سانالادى. «شوكولادتار، كامپيتتەر مەن تاتتىلەر ەرەكشە باعالانادى. قازاقتىڭ ۇنىنان جاسالعان نان تۋرالى ايتىپ تا قاجەتى جوق، ول بارلىق ۇيدە دەرلىك بار»، - دەيدى ول.
