قارلى بوران: ەلوردادا عيمارات بولشەكتەرى قۇلاپ، ەلەكتر جەلىلەرىندە اپات بولدى
112 جەلىسىنە 14-ءساۋىر ساعات 14:00-دەن باستاپ ءارتۇرلى سيپاتتاعى 3 مىڭنان استام قوڭىراۋ ءتۇستى. استانا قالاسى ت ج د بولىمشەلەرى جەلدىڭ قاتتى بولۋىنان مەتال كونسترۋكتسيالاردىڭ، قاپتاۋ پليتالارىنىڭ، پروفپاراقتاردىڭ قۇلاۋى، ەلەكتر سىمدارىنىڭ تۇيىقتالۋى سالدارىنان 10-نان استام شاقىرتۋعا شىقتى.
قازىرگى ۋاقىتتا جولدىڭ ناشار كورىنۋىنە، قاتتى جەل مەن بورانعا، كوكتايعاققا بايلانىستى 6 باعىت بويىنشا كولىك قۇرالدارىنىڭ بارلىق تۇرلەرى ءۇشىن رەسپۋبليكالىق ماڭىزى بار اۆتوجولدارداعى قوزعالىس جابىق. استانا - قوستاناي تاس جولى قاجىمۇقان كەنتىنە دەيىن عانا اشىق.
قۇتقارۋشىلار ەلوردا تۇرعىندارى مەن قوناقتارىنا قالا سىرتىنا شىعۋدان باس تارتۋ، ساق بولۋ، اۋا رايىنىڭ وزگەرۋى جانە ەنگىزىلگەن شەكتەۋلەر تۋرالى اقپاراتتى قاداعالاۋدى ۇسىنادى.
جەل كۇشەيگەن كەزدە عيماراتتاردان شىقپاي، ءۇي- جايلاردا بولۋدى ەسكەرتەدى. بالالاردى ەرەكشە باقىلاۋعا الۋ جانە ولاردى قاراۋسىز قالدىرماۋدى قاپەرگە بەرەدى.
«ەگەر قاتتى جەل كەزىندە كوشەدە بولساڭىز، جەر استى وتكەلدەرىندە نەمەسە عيماراتتاردىڭ كىرەبەرىستەرىندە پانالاۋدى ۇسىنامىز، تىرەكتەردەن، اعاشتاردان، بيلبوردتاردان، ەلەكتر جەلىلەرىنىڭ تىرەكتەرىنەن جانە سىمداردان اۋلاق بولۋعا تىرىسىڭىز.
- جەكە اۆتوكولىكتى اعاشتار مەن توزىعى جەتكەن عيماراتتاردان قاشىق قويۋ قاجەت؛
- تەرەزەلەردى، ەسىكتەردى، مۇرجالاردى جانە جەلدەتكىشتەردى مىقتاپ جابىڭىز؛
- قۇرىلىس وبەكتىلەرى حالىقتى جانە اۋماقتى قولايسىز اۋا رايىنىڭ اسەرىنەن قورعاۋ جونىندە قوسىمشا شارالار قابىلداسىن»، - دەلىنگەن حابارلامادا.
