پرەزيدەنت ازيا چەمپيوناتىنىڭ جەڭىمپاز جانە جۇلدەگەر بالۋاندارىن قۇتتىقتادى

استانا. قازاقپارات - پرەزيدەنت گرەك-ريم، ەركىن جانە ايەلدەر كۇرەسى بويىنشا ازيا چەمپيوناتىنىڭ جەڭىمپازدارى مەن جۇلدەگەرلەرىن قۇتتىقتادى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسى قاسىم-جومارت توقايەۆ گرەك-ريم، ەركىن جانە ايەلدەر كۇرەسى بويىنشا استانادا وتكەن ازيا چەمپيوناتىنىڭ جەڭىمپازدارى مەن جۇلدەگەرلەرىن جارقىن جەتىستىكتەرىمەن قۇتتىقتادى.

سىزدەر بايراقتى باسەكەدە توپ جارىپ، ەل ابىرويىن اسقاقتاتتىڭىزدار. بوز كىلەمدە جەڭىسكە دەگەن ەرىك-جىگەر مەن شەبەرلىكتىڭ وزىق ۇلگىسىن كورسەتىپ، جانكۇيەر قاۋىمعا زور قۋانىش سىيلادىڭىزدار. بۇل - تاباندىلىق پەن قايسارلىقتىڭ، تىنىمسىز ەڭبەكتىڭ ناتيجەسى. سىزدەردىڭ جەڭىستەرىڭىز سپورتتى سەرىك ەتكەن جاستاردى جىگەرلەندىرىپ، بيىك بەلەستەرگە باستايتىنى ءسوزسىز. ەلىمىز كۇرەس ونەرىن دامىتۋ ءۇشىن بارلىق جاعدايدى جاساپ وتىر. بالۋاندارىمىزدىڭ ءدۇبىرلى دودالاردا ۇزدىكتەر قاتارىنان كورىنۋى - سونىڭ ايقىن دالەلى، - دەپ جازىلعان پرەزيدەنتتىڭ قۇتتىقتاۋ حاتىندا.

مەملەكەت باسشىسى سپورتشىلارىمىزدىڭ الداعى ۋاقىتتا دا الامان سايىستاردا جوعارى ناتيجە كورسەتىپ، ەل مەرەيىن كوتەرە بەرەتىنىنە سەنىم ءبىلدىردى.

ايتا كەتسەك، قازاقستان قۇراماسىنىڭ قورىتىندى ناتيجەسى:

ەركىن كۇرەستەن:

4 التىن - سانجار دوسجان (70 ك گ)، دارحان ەسەنعالي (74 ك گ)، بولات ساقايەۆ (79 ك گ)، ازامات داۋلەتبەكوۆ (86 ك گ)؛

2 كۇمىس - ريزابەك ايتمۇقان (92 ك گ)، يۋسۋپ باتىرمۋرزايەۆ (125 ك گ)؛

1 قولا - راحات قالجان (57 ك گ).

جالپىكوماندالىق ەسەپتە - 1-ورىن.

ايەلدەر كۇرەسىنەن:

2 التىن - ءجاميلا باقبەرگەنوۆا (72 ك گ)، ەلميرا سىزدىقوۆا (76 ك گ)؛

3 قولا - مارينا سەدنيەۆا (55 ك گ)، نيلۋفار رايموۆا (57 ك گ)، ەلەنا شالىگينا (68 ك گ).

گرەك-ريم كۇرەسىنەن:

1 التىن - يبراگيم ماگومەدوۆ (72 ك گ)؛

2 كۇمىس - دياس قالەن (82 ك گ)، نۇرسۇلتان تۇرسىنوۆ (87 ك گ)؛

5 قولا - امانعالي بەكبولاتوۆ (55 ك گ)، مۇحامەدالي مامىربەك (63 ك گ)، المات كەبىسپايەۆ (67 ك گ)، ولجاس سىرلىباي (97 ك گ)، ءالىمحان سىزدىقوۆ (130 كگ) .

ەسكە سالساق، 9-14-ءساۋىر ارالىعىندا استانادا ج. ۇشكەمپىروۆ اتىنداعى جەكپە-جەك سارايىندا ەرەسەكتەر اراسىندا كۇرەس تۇرلەرىنەن ازيا چەمپيوناتى وتەتىنى حابارلانىپ، قازاقستان قۇراماسى انىقتالدى.

ازيا چەمپيوناتىندا جەڭگەن بالۋانداردىڭ جاتتىقتىرۋشىلارىنا دا اقشالاي سىياقى بەرىلەتىنى ءمالىم بولدى.

سونداي-اق، ازيا چەمپيوناتىنىڭ جارىس كەستەسى جاريالاندى.