وسكەمەندەگى قىزدار اراسىنداعى توبەلەس: جابىرلەنۋشىنىڭ تۋىسى جاڭا دەرەك ايتتى

استانا. قازاقپارات - الەۋمەتتىك جەلىدە وسكەمەندە سوققىعا جىعىلعان قىزدىڭ ۆيدەوسى تاراعان بولاتىن.

جابىرلەنۋشىنىڭ تۋىسى ءسىڭلىسىنىڭ جاعدايىنا جانە ايتىلىپ جاتقان اقپاراتتارعا قاتىستى مالىمدەمە جاسادى، - دەپ حابارلايدى Massaget.kz.

قازىر بۇل دەرەك بويىنشا سوتالدى تەرگەۋ جۇرگىزىلىپ جاتىر. الايدا الىمجەتتىك كورگەن قىزدىڭ تۋىسى ايتىلىپ جاتقان كەيبىر اقپاراتتار شىندىققا جاناسپايتىنىن جەتكىزدى. قىزدىڭ ءجابىر كورگەنى تۋرالى جاقىندارى 2-ساۋىردە بىلگەن.

جابىرلەنۋشىنىڭ تۋىسقانى توعجان دوسۋموۆانىڭ ايتۋىنشا، ءتارتىپ ساقشىلارىنا بولعان وقيعانى كوللەدج باسشىلىعى العاش حابارلادى دەگەن مالىمەت - جالعان. ال جانجالدىڭ بارلىعى جىگىت ءۇشىن باستالعان.

«ءسىڭلىمدى سوققان ءۇش قىزدىڭ ءبىرى Telegram ارقىلى سويلەسۋ الاڭىن اشقان. ول جەردە وسكەمەن جاستارىنىڭ بارلىعى وتىرادى. شاتاق سول جەردە باستالدى. وبلىستىق ءبىلىم باسقارماسىنىڭ باسشىسى ينەسسا چەرنىشەۆا ايتقانداي، كيكىلجىڭ جىگىت ءۇشىن بولسا دا، تۋىسىم بۇلاي قورلانباۋى كەرەك. مۇندا ۇرىپ-سوعۋ عانا ەمەس، ۇرلىق، اقشا تالاپ ەتۋ جاعدايلارى بار. ءسىڭلىم»ول اقشانى نە ىستەيسىڭدەر«دەپ سۇراعاندا،»وسى تۇسىرىلگەن ۆيدەونى تاراتىپ جىبەرمەس ءۇشىن«دەگەن. ىسكە قاتىسى بار قىز الدەقايدا كوپ»، - دەدى ول.

سوققى جەگەن قىزدىڭ قازىرگى جاعدايى ءالى تۇراقتالماپتى. توعجان دوسۋموۆانىڭ سوزىنشە، ارىز تۇسىرگەن سوڭ ءسىڭلىسى اۋرۋحاناعا جاتقىزىلىپ، سول جەردە ەكى اپتا ەم العان. ونىڭ ايتۋىنشا، جۋىقتا وتكەن بريفينگ كەزىندە ءبىلىم باسقارماسى مەن پوليتسيا دەپارتامەنتى ۇسىنعان مالىمەتتىڭ بارلىعى - جالعان اقپارات.

«بىرىنشىدەن، ءبىلىم باسقارماسى مەن كوللەدج تاراپىنان وقيعا بولعاننان كەيىن ەشقانداي شارا قولدانىلعان جوق. 3-ناۋرىزدان بەرى تىنىشتىق. ۆيدەو تاراعان سوڭ مينيسترلىككە بايلانىسقا شىعىپ، اتقارىلىپ جاتقان جۇمىستىڭ تىم سىلبىر ەكەنىن ايتتىم. تىم قۇرىعاندا سول ۆيدەونىڭ بارلىق جەردەن ءوشىرىلۋىن قاداعالاۋدى سۇرادىم. كوللەدج ديرەكتورى پسيحولوگتار كومەك بەرىپ جاتقانىن ايتىپتى. ودان قالسا، ءسىڭلىمدى ارنايى كولىكپەن ساباققا اپارىپ، اكەلىپ ءجۇر دەپتى. بۇل دا شىندىققا جاناسپايدى. سوندا وبلىستىق ءبىلىم باسقارماسى جاعدايدان تولىق حاباردار بولماسا، نەلىكتەن جالعان اقپارات تاراتادى؟» - دەدى توعجان دوسۋموۆا.

وڭىرلىك ءبىلىم باسقارماسى وكىلدەرىنىڭ ايتۋىنشا، كوللەدج اكىمشىلىگى جاراقات العان قىزدىڭ جاعدايى بويىنشا الدىمەن اتا-اناسىنا حابارلاسقان.

«بۇعان قاتىستى بەينەجازبا بار. كوللەدج اكىمشىلىگى پوليتسەيلەرگە»العاش حابار بەرگەن ءبىز«دەپ ايتپاعان، تەك قىزدىڭ دەنساۋلىعى بولماي تۇرعانىن بايقاعاندارىن جەتكىزگەن. ءارى قاراي زاڭگەرلىك كومەك بەرۋ تۋرالى ۇسىنىس ءبىلدىرىلدى. سول جەردە كولىكپەن كوللەدجگە اپارىپ، الىپ كەلۋ جاعىن دا ايتتى. ءبىراق قىزدىڭ جاقىندارى مۇنداي كومەك الۋدان باس تارتقان. ول تۋرالى وزدەرىنىڭ قولى قويىلعان حاتتاما بار»، - دەدى ينەسسا چەرنىشەۆا.

ەسكە سالايىق، بۇعان دەيىن وسكەمەن پوليتسياسى كامەرا الدىندا قاتارلاسىن اياۋسىز ۇرىپ، شەشىنۋگە ماجبۇرلەگەن ءبىر توپ جاسوسپىرىم قىزدارعا قاتىستى جابىرلەنۋشى قىزدىڭ ۆيدەوسىن تاراتۋ دەرەگى بويىنشا قىلمىستىق ءىس قوزعالعانىن ايتقانى حابارلانعان بولاتىن.