تۇركيانىڭ حاتاي قالاسى ۇيىندىلەردەن تازالانعاننان كەي جەرلەرى بوس قالدى - فوتو

حاتاي. قازاقپارات - تۇركيانىڭ وڭتۇستىك- شىعىسىنداعى جويقىن ءزىلزالادان زارداپ شەككەن وڭىرلەر ۇيىندىلەردەن تازالانعاننان كەيىن كوپ بولىگى قاڭىراپ قالدى، دەپ حابارلايدى قازاقپاراتتىڭ مەنشىكتى ءتىلشىسى.

قازىرگى ۋاقىتتا قيراعان ايماقتار تازالانىپ بولىپ قالدى. بۇرىن ءۇرعىن ءۇي، عيمارات پەن نىساندار تۇرعان ورىنداردا ەشتەڭە جوق. حاتاي پروۆينتسياسىنىڭ انتاكيا جانە دەفنە اۋداندارىنداعى 56 شاعىناۋداندا ۇيىندىلەردى كوشىرۋ جانە جويۋ جۇمىستارى ءالى جالعاسىپ جاتىر.

قوقىستى تازالاپ جاتقان بريگادالار، ونى جۇك كولىكتەرىنە تيەپ، سوعان ارنالعان ورىندارعا شىعارىپ تاستاپ جاتىر. كەيبىر ازاماتتار ءالى بۇرىنعى ۇيلەرى تۇرعان ورىنعا بارىپ، جەكە زاتتارىن تابۋدان ۇمىتتەنىپ ءجۇر.

قالادا 10000 قيراعان بولىكتى تازالاۋ جۇمىستارى جۇرگىزىلىپ جاتىر، ول جاقتان كۇندە شامامەن 300000 رەيس قوقىسقا شىعارىلادى.

جەرگىلىكتى بيلىك حاتاي پروۆينتسياسىنداعى انتاكيا اۋدانىندا كوپتەگەن قيراعان ۇيلەردى كوشىرۋ تۋرالى شەشىم قابىلداعاننان كەيىن، كوشىرىلگەن ورىندار بوساپ قالدى. مىڭداعان ادام تۇرعان، قالانىڭ قاربالاس ورتالىعى بولعان ورىندار قيراندىلار ۇيىلگەن بوس ايماققا اينالدى.

تۇركيا بيلىگى اپاتتىڭ سالدارىن مۇمكىندىگىنشە تەز جويۋ ءۇشىن ءبارىن ىستەپ جاتىر.

ماسەلەن، جاقىندا تۇركيا پرەزيدەنتى رەجەپ تايىپ ەردوعان مالاتيادا 1442 ءتۇرعىنۇي مەن بولەك 250 اۋىلدىق ءۇي، سونداي-اق 47 دۇكەن مەن 464 شاقىرىم اۆتوكولىك جولى سالىنعانىن حابارلادى. مەملەكەت باسشىسىنىڭ سوزىنشە، بارلىق سالىنعان نىسان ءداستۇرلى ارحيتەكتۋراعا ساي كەلىپ، 3-4 قاباتتان تۇرادى. جالپى پروۆينتسيادا 70000 ءتۇرعىنۇي مەن 25000 جەكە ءۇي سالىنادى.

قازىرگى ۋاقىتتا قيراعان عيماراتتاردىڭ تەحنيكالىق جاعدايى مەن نورمالاردىڭ ساقتالۋىنا جاۋاپتى 300 ادام تۇتقىندالدى.

بۇعان دەيىن تۇركيانىڭ وڭتۇستىك- شىعىسىندا 7,7 جانە 7,6 بالدىق جويقىن جەر سىلكىنىسى بولدى. جەراستى ءدۇمپۋى ەلدىڭ 11 پروۆينتسياسى مەن كورشى ەلدەردە، ونىڭ ىشىندە سيريادا سەزىلدى.