بۋراباي ۇلتتىق پاركىندە سۋسىن مەن تاعام ساۋداسىنا تىيىم سالىندى
بۋراباي دەمالىس ايماعىندا سۋسىن مەن تاعام ونىمدەرىن ساتۋعا تىيىم سالىندى، دەپ حابارلادى 31-ارنانىڭ «ينفورمبيۋرو» اقپاراتتىق باعدارلاماسى.
ۇلتتىق پارك باسشىلىعى بيىلدان باستاپ دەمالىس ايماعىندا سۋسىن مەن تاعام ساۋداسىنا ورىن بولمەيتىنىن حابارلادى. بۇل - اجارى ايشىقتى ايماقتى تازا ۇستاۋ ءۇشىن جاسالىپ وتىرعان قادام.
دەسە دە، پارك وكىلدەرى قوعامدىق ورىندا تازالىقتى ساقتامايتىن دەمالۋشىلاردىڭ بارلىعىن بىردەي جازالاۋ مۇمكىن ەمەس ەكەنىن ايتتى. ولاردىڭ ايتۋىنشا، جازدا دەمالۋعا كەلەتىندەردىڭ كوبى كولدى قوقىسقا تولتىرىپ، تابيعاتقا زيان كەلتىرەدى. ماسەلەن، بيىل قىستا بۋراباي كولدەرىنەن 3 تونناعا جۋىق قوقىس جينالعان. ال وتكەن جىلى ساۋدا دۇڭگىرشەكتەرى قويىلماعان جەرلەر الدەقايدا تازا بولعان. سوندىقتان ەندى بۋراباي ۇلتتىق پاركىنىڭ بارلىق اۋماعىندا ساۋدا ورنى بولمايدى. دەمالۋشىلار تاماعىن وزىمەن بىرگە الا كەلۋى كەرەك.
«دەمالىس ايماعىنىڭ جەرلەرى تەك ۆەلوسيپەدتى جالعا بەرۋگە، بودي-ارت ءۇشىن جانە كادەسىيلار ساتىلىمىنا بەرىلەدى. مۇنداي شەشىم ۇلتتىق پارك اۋماعىنا سانيتارلىق جۇكتەمەنى ازايتۋ ماقساتىندا قابىلداندى. وعان قوسا، بۋراباي تۇرعىندارىنىڭ تالاپ- تىلەكتەرىن ەسكەردىك»، - دەپ ءتۇسىندىردى «بۋراباي» مەملەكەتتىك ۇلتتىق تابيعي پاركى ديرەكتورىنىڭ ورىنباسارى باۋىرجان ماحمەتوۆ.
