قازاقستاندا تۇراتىن وزگە ۇلتتاردىڭ قانشا پايىزى قازاق تىلىندە سويلەيدى؟

استانا. قازاقپارات – ءتىل ساياساتى كوميتەتىنىڭ مالىمەتىنشە، قازاق تىلىندە سويلەيتىن وزگە ۇلت وكىلدەرىنىڭ سانى ارتىپ كەلەدى.

عىلىم جانە جوعارى ءبىلىم مينيسترلىگىنە قارايتىن ءتىل ساياساتى كوميتەتى اشىق نقا پورتالىندا قازاقستان رەسپۋبليكاسىندا ءتىل ساياساتىن دامىتۋدىڭ 2023-2029 -جىلدارعا ارنالعان تۇجىرىمداسىنىڭ جوباسىن قوعام تالقىسىنا ۇسىندى.

جوبادا قازاقستانداعى قازىرگى تىلدىك احۋالعا سيپاتتاما بەرىلگەن.

«قازاقستاندا ازاماتتاردىڭ تىلدىك قۇزىرەتتىلىگى ءارتۇرلى قالىپتاسىپ وتىر. اتاپ ايتقاندا، قازاقتىلدىلەر، قازاق- ورىستىلدىلەر، ورىستىلدىلەر، ەتنيكالىق قازاقشا، ەتنيكالىق ورىسشا تىلدىلەر نەمەسە ەتنيكالىق ورىسشا- قازاقشا ءۇش ءتىلدى بىلەتىندەر جانە قازاق- ورىس- اعىلشىن ءۇش ءتىلدى مەڭگەرگەندەر»، - دەپ جازىلعان تۇجىرىمداما جوباسىندا.

ءتىل ساياساتى كوميتەتىنىڭ مالىمەتىنشە، قازاقستاندا قازاق تىلىندە سويلەيتىن ازاماتتاردىڭ سانى ارتىپ كەلەدى.

قازاقستاندا تۇراتىن وزگە ۇلت وكىلدەرىنىڭ قازاق تىلىندە وقي، جازا جانە سويلەي الاتىندارىنىڭ ۇلەسى تومەندەگىدەي:

تۇركىتىلدەس حالىقتاردىڭ ىشىندە:

وزبەكتەردىڭ 72 پايىزى؛

ۇيعىرلاردىڭ 71,7 پايىزى؛

قىرعىزداردىڭ 58,5 پايىزى قازاق تىلىندە سويلەي الادى.

بۇل ۇلتتاردىڭ 12 پايىزى قازاقشا وقىپ، جازۋدى جوعارى دەڭگەيدە مەڭگەرگەنى انىقتالعان.

سلاۆيان دياسپوراسى ىشىندە:

ورىستاردىڭ 25,1 پايىزى؛

ۋكراينداردىڭ 23,7 پايىزى؛

بەلورۋستاردىڭ 22,8 پايىزى؛

پولياكتاردىڭ 22,1 پايىزى؛

نەمىس دياسپوراسىنىڭ 25,2 پايىزى اۋىزەكى قازاق ءتىلىن تۇسىنەدى.

«اتالعان دياسپورالار ىشىندە قازاقشا وقىپ، جازا بىلەتىندەر ۇلەسى - 2,9 پايىزدى قۇرايدى. كورسەتىلگەن ساندىق وزگەرىستەر مەملەكەتتىك ءتىل قولدانىسىنىڭ ساپاسىن ءالى دە بولسا جاقسارتۋدى تالاپ ەتەدى»، - دەپ جازىلعان تۇجىرىمداما جوباسىندا.