باعا، ازىق-تۇلىك، ەكسپورت. توقايەۆ جۇمانعارينگە ءبىرقاتار تاپسىرما بەردى

استانا. قازاقپارات - مەملەكەت باسشىسى قاسىم-جومارت توقايەۆ پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعاريندى قابىلدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنتكە ەلىمىزدىڭ ساۋدا سالاسىنىڭ بىلتىرعى دامۋ قورىتىندىسى، ۇكىمەتتىڭ باعانى تۇراقتاندىرۋ جانە قازاقستاندىقتاردى وتاندىق ازىق-تۇلىكپەن تولىق قامتاماسىز ەتۋ جونىندەگى شارالارى تۋرالى باياندالدى، سونداي-اق اۋىل شارۋاشىلىعىن دامىتۋعا قاتىستى ۇسىنىس بەرىلدى.

سەرىك جۇمانعاريننىڭ ايتۋىنشا، 2022 -جىلى قازاقستانداعى تاۋار اينالىمىنىڭ جالپى كولەمى - 134,4 ميلليارد دوللارعا جەتكەن. بۇل كورسەتكىش 2021 -جىلمەن سالىستىرعاندا 32,1 پايىزعا كوپ. قىزمەت كورسەتۋ ساۋداسى 26,3 پايىزعا ءوسىپ، 12,3 ميلليارد دوللاردى قۇرادى. قازاقستاننىڭ بارلىق نەگىزگى ساۋدا سەرىكتەسىمەن ءوزارا تاۋار اينالىمىندا ءوسىم بايقالادى.

وڭدەلگەن ونىمدەر ەكسپورتى 26,5 ميلليارد دوللاردى قۇراپ، بۇرىن-سوڭدى بولماعان كورسەتكىشكە جەتتى. تەرەڭ وڭدەلگەن ەكسپورت تاۋارلارىنىڭ ءتىزىمى كەڭەيىپ، وتاندىق تاۋارلار جاڭا ەكسپورت نارىقتارىنا شىقتى.

قاسىم-جومارت توقايەۆقا الەۋمەتتىك ماڭىزى بار ازىق-تۇلىك تاۋارلارىنىڭ وتاندىق ءوندىرىسىنىڭ جاعدايى تۋرالى ايتىلدى. قازاقستان تۇرعىنداردىڭ قاجەتتىلىگىن 19 ءونىم ءتۇرىنىڭ 10 ى بويىنشا تولىق، 6 ءونىم تۇرىمەن 80-98 پايىز جانە تاعى ءۇش ءونىم بويىنشا 50 دەن 68 پايىزعا دەيىن قامتاماسىز ەتەدى. يمپورتقا تاۋەلدىلىكتى بارىنشا ازايتۋ ءۇشىن الداعى ۋاقىتتا وڭىرلەردە ىسكە اسىرىلاتىن ءىرى اگروجوبالاردىڭ توپتاماسى جاساقتالادى.

كەزدەسۋ سوڭىندا مەملەكەت باسشىسى الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە اۋىل شارۋاشىلىعىن دامىتۋ، قوسىمشا قۇنى جوعارى قازاقستاندىق تاۋارلاردى ەكسپورتقا بەلسەندى تۇردە شىعارۋ جۇمىستارىن جانداندىرۋدى تاپسىردى.