سپورتشىلار مەن جاتتىقتىرۋشىلارعا ءومىر بوينا بەرىلەتىن تولەم مولشەرى بەلگىلەندى

استانا. قازاقپارات - مادەنيەت جانە سپورت مينيسترلىگى «سپورتشىلار مەن جاتتىقتىرۋشىلارعا ءومىر بويى اي سايىنعى ماتەريالدىق قامسىزداندىرۋدى تولەۋ قاعيدالارىن بەكىتۋ، ولاردىڭ مولشەرىن بەلگىلەۋ تۋرالى» بۇيرىعىنىڭ جوباسىن ازىرلەدى.

قۇجات «اشىق» ن ق ا پورتالىندا جاريالاندى، دەپ حابارلايدى قازاقپارات ءتىلشىسى.

بۇيرىق- جوباسىندا جازىلعانداي، ءومىر بويى اي سايىنعى ماتەريالدىق قامسىزداندىرۋ دەنە شىنىقتىرۋ جانە سپورت سالاسىندا كەمىندە 20 جىل ەڭبەك ءوتىلى بار مىنا سپورتشىلار مەن جاتتىقتىرۋشىلارعا تاعايىندالادى:

- وليمپيادا، پاراليمپيادا جانە سۋردليمپيادا ويىندارىنىڭ چەمپيوندارى مەن جۇلدەگەرلەرى نەمەسە سپورتتىڭ وليمپيادالىق تۇرلەرى بويىنشا الەم چەمپيوندارى اتاقتارىن جەڭىپ العان سپورتشىلارعا؛

- وسى سپورتشىلاردى دايىنداعان جاتتىقتىرۋشىلارعا.

«ءبىر سپورتشىنى دايىنداعانى ءۇشىن ماتەريالدىق قامسىزداندىرۋ ءبىر جاتتىقتىرۋشىعا تولەنەدى. سپورتشى بەلگىلەنگەن تالاپتاردى قايتالاپ ورىنداعان جاعدايدا ماتەريالدىق قامسىزداندىرۋ باسقا جاتتىقتىرۋشىعا دا تولەنەدى. ماتەريالدىق قامسىزداندىرۋ دەنە شىنىقتىرۋ جانە سپورت سالاسىنداعى ۋاكىلەتتى ورگاننىڭ بيۋدجەتتىك باعدارلامالارى ارقىلى رەسپۋبليكالىق بيۋدجەت قاراجاتى ەسەبىنەن تولەنەدى»، - دەلىنگەن قۇجاتتا.

اتالعان ەرەجە تالابىنا ساي كەلەتىن سپورتشىلار مەن جاتتىقتىرۋشىلار ءومىر بويىنا الاتىن تولەم كەلەسىدەي:

- وليمپيادا، پاراليمپيادا جانە سۋردليمپيادا ويىندارىنىڭ چەمپيوندارى مەن جۇلدەگەرلەرى نەمەسە وليمپيادالىق سپورت تۇرلەرى بويىنشا الەم چەمپيوندارى اتاقتارىن جەڭىپ العان سپورتشىلارعا - 100-ايلىق ەسەپتىك كورسەتكىش (345000 تەڭگە)؛

- وليمپيادا، پاراليمپيادا جانە سۋردليمپيادا ويىندارىنىڭ چەمپيوندارى مەن جۇلدەگەرلەرى نەمەسە وليمپيادالىق سپورت تۇرلەرى بويىنشا الەم چەمپيوندارى اتاقتارىن جەڭىپ العان سپورتشىلاردى دايىنداعان جاتتىقتىرۋشىلارعا – 100 ايلىق ەسەپتىك كورسەتكىش (345000 تەڭگە).

بۇيرىق- جوباسى 26-ساۋىرگە دەيىن كوپشىلىك تالقىلاۋدا بولادى.