الەمدەگى ەڭ ۇلكەن ۇشاقتى قازاق جىگىتى تىزگىندەپ ءجۇر
ونى بىرىككەن اراب امىرلىكتەرىنىڭ اۋە كومانياسى قازاقستاننان شاقىرىپ العان. كەلىسىمشارت نەگىزىندە جۇمىس ىستەپ جاتقان تالعات الىپ ۇشاقپەن الەمنىڭ تۇكپىر- تۇكپىرىنە جولاۋشىلاردى تاسىپ ءجۇر. 600 ورىندى Airbus A380 لاينەرىمەن ا ق ش- قا ۇشقالى جاتقان قازاق جىگىتى ۋاقىتىنىڭ تىعىزدىعىنا قاراماستان Qazaq.today اقپاراتتىق اگەنتتىگىنىڭ تىلشىسىنە سۇحبات بەردى.
«قازىر بىرىككەن اراب امىرلىگىندە الەمدەگى ەڭ ۇلكەن 600 ادامدىق Airbus A380 ۇشاعىندا ەكىنشى پيلوت بولىپ جۇمىس ىستەيمىن. كوبىنە ا ق ش، اۋستراليا، ەۋروپانىڭ ءىرى قالالارىنا ۇشامىز، جالپى دۇنيەجۇزىنىڭ بارلىق كونتينەنتتەرىنە رەيستەر بار. ۇلكەن ۇشاق بولعان سوڭ ۇزاق رەيستەر جاسايمىز. ورتاشا العاندا 12-13 ساعاتتى الادى، ەڭ ۇزاق ساپار بىرىككەن اراب امىرلىكتەرىنەن ا ق ش- تىڭ كاليفورنيا شتاتىنا ۇشۋ كەزىندە بولادى. ونداي ساپارلاردا 16-17 ساعاتتاي اۋەدە بولامىز»، - دەدى ءبىرجان تالعاتبەك ۇلى.
ءبىرجاندى الپاۋىت شەتەلدىك كومپانيانىڭ باسشىلارى ءۇش كۇندىك سىناقتان سوڭ بىردەن جۇمىسقا قابىلداعان. ول العاشىندا الماتى قالاسىنداعى ازاماتتىق اۆياتسيا اكادەمياسىنا وقۋعا تۇسكەن. الايدا ءبىرىنشى كۋرستى بىتىرگەن سوڭ وقۋدى تاستاپ كەتكەن. Air Astana-نىڭ Ab-Initio ۇشقىشتاردى دايىنداۋ باعدارلاماسى بويىنشا ەمتيحان تاپسىرادى. سىناقتان سۇرىنبەگەن قازاق جىگىتى وسىلايشا امەريكادان ءبىراق شىققان.
«ا ق ش- تىڭ فلوريدا شتاتىنان شاقىرتۋ الدىم. ستەنفورد قالاسىنداعى «Aerosim Flight Academy-گە وقۋعا ءتۇستىم. ول جەردە ءبىر جارىم جىل وقىدىم. كەيىن بەلگيانىڭ شارلەرۋا قالاسىنداعى «Belgian Flight School» ۇشقىشتاردى دايارلاۋ مەكتەبىندە 3 ايداي وقىدىم. وسىلايشا باس- اياعى 2 جىلدا دايىن ۇشقىش بولىپ شىقتىم»، - دەدى ول.
وقۋىن بىتىرگەن سوڭ ءبىرجان ەلىمىزدەگى وتاندىق اۋە كومپانياسىندا ۇشقىش بولىپ 7 جىل ىستەگەن. وسىدان ەكى جىل بۇرىن الەمدىك الپاۋىت كومپانياعا تاعى دا قۇجاتتارىن جىبەرگەن. قازاق جىگىتى شەتەلدىك كومپانيالاردىڭ تولەيتىن جالاقىسى ەلدەگى ايلىقپەن سالىستىرعاندا الدەقايدا كوپ ەكەنىن، ءارى قىزمەتكەرلەرگە جان- جاقتى جاعداي جاسالعانىن ايتادى. «وتاندىق اۋە تاسىمالداۋ سالاسىن ءالى دە دامىتا ءتۇسۋ كەرەك» دەپ سانايدى ءبىرجان.
«بىرىككەن اراب امىرلىگىندە ۇشقىشتارعا بارلىق جاعداي جاسالعان. كومپانيا تۇراتىن ءۇيدى وزدەرى بەرەدى. شاعىن وتباسى بولسا قالادان پاتەر جالداپ بەرەدى. كوپ بالالى وتباسى بولسا، جەر ۇيدەن بەرەدى. ۇشقىشتىڭ بالالارىن حالىقارالىق وقۋ ورىندارىندا تەگىن وقىتادى. مەديتسينالىق ساقتاندىرۋ بار جانە جىلىنا بىرنەشە رەت ۇشۋ بيلەتتەرىن تەگىن بەرەدى. ۇشقىشتىڭ فيزيكالىق جانە پسيحولوگيالىق دەنساۋلىعى ۇنەمى الەمدىك ستاندارتقا ساي بولۋى كەرەك. ۇشقىشقا دا قويىلاتىن تالاپ وتە جوعارى. اسپاندا بولۋى مۇمكىن كۇردەلى جاعدايلارعا ءاردايىم دايىن بولۋىمىز كەرەك. دۋبايداعى اۋەكومپانياسىنا ەكى جىل بۇرىن قۇجاتتارىمدى تاپسىرعان بولاتىنمىن. قۇجاتتارىم قابىلدانعان سوڭ، 3 كۇندىك سىناقتان ءساتتى ءوتىپ، جۇمىسقا قابىلداندىم.
شەتەل اۋەكومپانياسىندا جۇمىس ىستەۋ مەن ءۇشىن ۇلكەن تاجىريبە مەكتەبى. الەمنىڭ ءارتۇرلى مەكەنىنە ۇشىپ، ءارتۇرلى ۇلت وكىلدەرىمەن ارىپتەس بولۋ، ولاردىڭ ادەت- عۇرپىن، ءتىلى مەن مادەنيەتىمەن تانىسۋ كوڭىل كوكجيەگىمنىڭ اشىلۋىنا اسەر ەتتى. قازاقستاننان شىققان ۇشقىشتار كاتار، ۆەتنام، گونكونگ تاعى باسقا دا دۇنيەجۇزىلىك اۋەكومپانيالاردا ىستەپ جاتىر. قازاقستاندا اۆياتسيا سالاسىن دامىتۋعا ءالى دە كوپ جۇمىس جاسالۋ كەرەك. جاڭا ۇشۋ تەرمينالدارى سالىنىپ، جاڭا باعىتتار اشىلا بەرسە، اۋە قىزمەتى دە زاماناۋي جاعىنان دامي تۇسپەك»، - دەدى ول.
ءبىرجاننىڭ بالالىق شاعى الماتىنىڭ ىرگەسىندەگى بايسەركە اۋىلىندا وتكەن. ونىڭ اكەسى دە اۆياتسيا سالاسىندا ۇزاق جىل جۇمىس جاساپتى. تالعاتبەك كامىسحان ۇلى موڭعوليانىڭ باي- ولكە ايماعىنان تاۋەلسىزدىك العان جىلدارى تاريحي وتانىنا كوشىپ كەلگەن.
«1993 -جىلى ش ق و- نىڭ ءبىرجان دەگەن اۋىلىندا دۇنيەگە كەلدىم. اكەم تالعاتبەك كامىسحان ماسكەۋ وبلىسىنداعى ەگوريەۆسك قالاسىندا چەكالوۆ اتىنداعى اۆياتسيالىق تەحنيكالىق كوللەدجىن، سوسىن الماتىداعى ازاماتتىق اۆياتسيا اكادەمياسىندا ءتامامداعان. الماتى قالاسىنداعى ۇشاقتارعا تەحنيكالىق قىزمەت كورسەتۋ ورتالىعىندا ان-24، تۋ-134، ياك-42، تۋ-154 ۋشاقتاردىنا ينجينەر- مەحانيگى بولىپ جۋمىس اتقارعان. بالالىق شاعىم الماتى وبلىسىنداعى بايسەركە اۋىلىندا ءوتتى. مەكتەپتى الماتىدان وقىدىم. ساباقتان بوس ۋاقىتتاردا ءارتۇرلى سپورت سەكسيالارىنا، دومبىرا ۇيىرمەلەرىنە دە قاتىستىم. بۇگىندە وتباسىممەن دۋبايدا تۇرام، ءبىر بالامىز بار»، - دەدى ۇشقىش.
