تۇركىستان وبلىسىنىڭ ديقاندارى قىرىققاباتتى رەسەيگە ەكسپورتتاپ جاتىر

تۇركىستان. قازاقپارات- تۇركىستان وبلىسىنىڭ ديقاندارى قىرىققاباتتىڭ ەكسپورتىن باستادى، دەپ حابارلايدى قازاقپارات ءتىلشىسى.

جەتىساي اۋدانىندا بيىل 1162 گەكتار اۋماققا ەرتە پىسەتىن قىرىققابات ەگىلگەن بولاتىن. ءونىمنىڭ باسىم بولىگىن «زاريسما»، «ۆاليكور»، «ماگنۋس»، «كيەۆين فاراو»، «ريندا»، «زاكاز» سورتتارى قۇراپ وتىر. قازىرگى كەزدە ەرتە پىسەتىن قىرىققاباتتار رەسەي، بەلورۋسسيا جانە ەۋروپا ەلدەرىنە ەكسپورتتالا باستادى.

ماسەلەن، وڭىردەگى «داۋىلباي اتا» شارۋا قوجالىعى العاشقى قىرىققابات ونىمدەرىن كورشىلەس رەسەي ەلىنە جىبەرىپ جاتىر.

«48-50 كۇندە پىسەتىن پەكينكا قىرىققاباتى العاشقى ءونىمىن بەرە باستادى. 1,5 گەكتارعا ەگىلگەن 60 مىڭ ءتۇپ كوشەتتەن شىققان قىرىققابات 60 توننانى قۇراپ وتىر. بۇل كەتكەن شىعىندارىمىز مەن توككەن تەرىمىزدىڭ تولىقتاي اقتالعانىن بىلدىرەدى. ارتىلعان قىرىققابات رەسەي مەملەكەتىنىڭ استاناسى ماسكەۋ قالاسىنا جونەلتىپ جاتىرمىز»، دەيدى «داۋىلباي اتا» شارۋا قوجالىعىنىڭ ءتوراعاسى مومىنجان رادجاپوۆ.