قىزىل ءتۇستى كيىم قاتەرلى ىسىكتى ەمدەۋگە كومەكتەسەتىنى راس پا؟
بۇل - جالعان اقپارات، - دەپ حابارلايدى Massaget.kz ءتىلشىسى.
ۆيدەودا بۇرىن كيىم تۇسىمەن اۋرۋلاردى ەمدەۋ قۇپيا بولماعان، ول تۋرالى ءبارى بىلگەن دەلىنگەن. مىسالى، ونكولوگيا اۋرۋلارىن قىزىل تۇسپەن، بۇيرەك جانە نەسەپ جۇيەسى اۋرۋلارىن سارى، باۋىر كوك كيىمدەرمەن ەمدەلگەن، ال قارا ءتۇس دەنساۋلىققا تەرىس اسەر ەتەدى دەپ سانالعان.
مۇنداي ەمدەۋ ءادىسى بولعانىنا جازباشا دالەلدەر جوق. ەجەلگى زاماندا وسىلاي ەمدەلگەندەر بولسا دا، ونىڭ ءتيىمدى بولعانى كۇماندى.
كيىم ءتۇسىنىڭ ادامنىڭ ىشكى اعزالارىنىڭ اۋرۋلارىنا اسەرىنە قاتىستى عىلىمي دالەلدەر جوق.
تۇستەر كەيبىر پسيحولوگيالىق جاعدايلاردى تۇزەتۋ ءۇشىن قولدانىلۋى مۇمكىن. بۇل ءتاسىل «ءتۇس تەراپياسى» دەپ اتالادى. جەكەلەگەن عىلىمي زەرتتەۋلەر تۇستەردىڭ ميدا ءارتۇرلى ەلەكترلىك يمپۋلس تۋدىراتىنىن كورسەتەدى.
تۇستەر تەراپياسى شارشاعان ادامنىڭ كوڭىلىن كوتەرۋگە، ءتىپتى ۇيقىسىزدىققا دۋشار بولعاندارعا ۇيىقتاۋعا كومەكتەسەدى. الايدا تۇستەر تەراپياسىنىڭ پايداسى مەن تيىمدىلىگى تۋرالى ناقتى عىلىمي تۇجىرىمدار جوق.
قاتەرلى ىسىككە كەلەتىن بولساق، عىلىمي ادەبيەتتەردە ىسىكتەردى ەمدەۋ ءۇشىن قىزىل جارىق قولدانىلاتىن ادىستەر بار. الايدا بۇل جاي كيىم كيۋگە قاراعاندا الدەقايدا كۇردەلى.
بۇل ەمدەۋ ءادىسى فوتوديناميكالىق تەراپيا دەپ اتالادى. ونىڭ بارىسىندا ىسىك تىندەرىنە جارىق سىڭىرەتىن پرەپاراتتار نەمەسە فوتوسەنسيبيليزاتورلار ەگىلەدى، كەيىن ولاردى قىزىل نەمەسە ينفراقىزىل ساۋلەمەن ساۋلەلەندىرەدى.
ءبىرىنشى بۋىنداعى Photofrin فوتوسەنسيبيليزاتورى 1993-جىلى قولدانۋعا ماقۇلداندى، ءبىراق ونىڭ تيىمدىلىگى تومەن بولدى. قازىرگى زامانعى پرەپاراتتار تيىمدىرەك. كەيبىر عالىمداردىڭ ايتۋىنشا، بولاشاقتا فوتوديناميكالىق تەراپيا ونكولوگيالىق اۋرۋلاردى ەمدەۋدىڭ نەگىزگى ادىستەرىنىڭ بىرىنە اينالۋى مۇمكىن.
بەلگىلى ءبىر ءتۇستى كيىم كيۋ فيزيكالىق دەنساۋلىققا ەشقانداي اسەر ەتپەيتىنىن كورسەتەدى. بۇعان عىلىمي نەگىز جوق. ونكولوگيالىق اۋرۋلاردى حالىقتىق ادىستەرمەن ەمدەۋ ءقاۋىپتى بولۋى مۇمكىن، ويتكەنى پاتسيەنت وپەراتسيا نەمەسە ءدارى-دارمەكپەن ەمدەۋگە بولاتىن ۋاقىتتى وتكىزىپ الۋى مۇمكىن.
