پرەزيدەنت جوعارى لاۋازىمدى تۇلعالار اراسىنداعى جەمقورلىقتى انىقتاۋعا باسا ءمان بەرۋدى تاپسىردى

استانا. قازاقپارات - مەملەكەت باسشىسى قاسىم-جومارت توقايەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات ءجۇماعاليدى قابىلدادى. قازاقپارات بۇل تۋرالى اقورداعا سىلتەمە جاساپ حابارلايدى.

پرەزيدەنتكە ەلىمىزدەگى جەمقورلىققا قارسى ءىس- قيمىل شارالارى جونىندە ەسەپ بەرىلدى. اتاپ ايتقاندا، ءبىرىنشى توقساندا 500-دەن استام جەمقورلىق قىلمىس تىركەلىپ، 400-دەن اسا تۇلعانىڭ جەمقورلىق ارەكەتى اشكەرەلەندى. ونىڭ 53 ى ءارتۇرلى دەڭگەيدەگى باسشىلار.

اسحات جۇماعاليدىڭ ايتۋىنشا، بيىل 23-قاڭتاردان باستاپ شاعىن جانە ورتا كاسىپكەرلىكتى دامىتۋ جولىنداعى اكىمشىلىك كەدەرگىلەردى جويۋعا باعىتتالعان «بيزنەسكە جول» جوباسى ىسكە قوسىلعان. جوبا اياسىندا شامامەن 7 مىڭ كاسىپكەر كومەك الىپ ۇلگەردى.

بۇدان بولەك، مەملەكەت باسشىسىنا جەمقورلىققا جول بەرمەۋ ءۇشىن قابىلدانىپ جاتقان الدىن الۋ جانە ساقتاندىرۋ شارالارى جونىندە مالىمەت بەرىلدى. وسى رەتتە بيىل سىبايلاس جەمقورلىققا قارسى قىزمەت سىبايلاس جەمقورلىققا اكەپ سوقتىراتىن قاتەرلەردى جويۋعا قاتىستى 769 ۇسىنىم مەن ۇسىنىس ەنگىزدى.

پرەزيدەنت جەمقورلىققا يتەرمەلەيتىن جۇيەلى سەبەپتەر مەن جاعدايلاردى جويۋ اسا ماڭىزدى ەكەنىن اتاپ ءوتتى. سونىمەن قاتار ق. توقايەۆ جوعارى لاۋازىمدى تۇلعالار اراسىنداعى سىبايلاس جەمقورلىقتى انىقتاۋعا جانە ونىڭ جولىن كەسۋگە باسا ءمان بەرۋدى تاپسىردى.