يلحام اليەۆتىڭ قازاقستانعا ساپارى وداقتاستىق قاتىناستاردى دامىتۋعا تىڭ سەرپىن بەرەدى - توقايەۆ
بۇل تۋرالى اقوردادا ازەربايجان پرەزيدەنتىمەن كەڭەيتىلگەن قۇرامدا كەلىسسوز وتكىزگەن مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«شاعىن قۇرامداعى كەلىسسوز بارىسىندا ءبىز كۇن تارتىبىمىزدەگى ءبىرقاتار وزەكتى ماسەلەنى تىڭعىلىقتى تالقىلادىق، مەملەكەتتەردىڭ ءوزارا ءىس-قيمىلىنىڭ جاڭا ءوسىم نۇكتەلەرىن ايقىندادىق، حالىقارالىق قۇرىلىمدار اياسىندا ديالوگتى نىعايتۋ جايىندا پىكىر الماستىق. جانە دە وسى تۇستاردىڭ بارلىعى دا بۇگىن ءبىز قول قوياتىن بىرلەسكەن مالىمدەمەدە تيىسىنشە ورىن الادى. ءسىزدىڭ قازاقستانعا ساپارىڭىز زور مانگە يە ەكەندىگىنە سەنىم ارتامىن. ول ەلدەرىمىز اراسىنداعى وداقتاستىق قارىم-قاتىناستى دامىتۋعا قۋاتتى سەرپىن بەرەرى ءسوزسىز»، - دەدى قازاقستان پرەزيدەنتى.
وسىعان دەيىن قازاقستان مەن ازەربايجان اراسىندا تاۋار اينالىمىن 1 ميلليارد دوللارعا جەتكىزۋگە بولاتىنى ايتىلدى.
