قازاقستان مەن ازەربايجان پرەزيدەنتتەرى كەڭەيتىلگەن قۇرامدا كەلىسسوزدەر جۇرگىزدى
مەملەكەت باسشىسى ەكى ەل اراسىنداعى ىنتىماقتاستىقتى نىعايتۋ ءۇشىن ازەربايجان پرەزيدەنتىنىڭ بۇل ساپارىنىڭ ماڭىزى زور ەكەنىن ايتتى، دەپ حابارلايدى اقوردانىڭ باسپا ءسوز قىزمەتى.
«ءبىز بىلتىر ستراتەگيالىق قاتىناستاردى نىعايتۋ جانە وداقتاستىق ىنتىماقتاستىقتى تەرەڭدەتۋ تۋرالى دەكلاراتسياعا، سونداي-اق ىنتىماقتاستىقتى دامىتۋدىڭ 2026-جىلعا دەيىنگى كەشەندى باعدارلاماسىنا قول قويدىق. بۇگىن تاعى ءبىرقاتار ماڭىزدى قۇجات قابىلدانادى. سونىمەن قاتار ءسىزدىڭ بۇگىنگى ساپارىڭىز اياسىندا ىنتىماقتاستىعىمىزدىڭ ساياسي تۇعىرناماسىنا تىڭ سەرپىن بەرەتىن جوعارى مەملەكەتارالىق كەڭەس قۇرامىز. بۇل ەكىجاقتى قاتىناستارعا تىڭ سەرپىن بەرەتىنى ءسوزسىز»، - دەدى پرەزيدەنت.
«ساۋدا-ەكونوميكالىق ىنتىماقتاستىعىمىزدىڭ ايتارلىقتاي ىلگەرىلەپ كەلە جاتقانىنا كوڭىل تولاتىنىن ايتقىم كەلەدى. بۇگىن اتاپ وتكەنىمىزدەي، تاۋار اينالىمى 40 پايىزعا ارتىپ، جارتى ميلليارد دوللارعا جەتتى. بۇل ۇلكەن ناتيجە دەپ ويلايمىن. ەكونوميكالىق الەۋەتىمىز تولىق پايدالانا وتىرىپ، بۇل كورسەتكىشتى 1 ميلليارد دوللارعا دەيىن جەتكىزەتىنىمىزگە سەنىمدىمىن. بۇل ءۇشىن بىزدە ەنەرگەتيكا، كولىك، لوگيستيكا، IT، اۋىل شارۋاشىلىعى، ونەركاسىپ جانە تاعى باسقا سالالاردا ايتارلىقتار رەزەرۆتەر بار»، - دەدى مەملەكەت باسشىسى.
«ەكى ەلدىڭ مادەني ونكۇندىگىن وتكىزۋ تۋرالى ۋاعدالاستىقتى ەرەكشە اتاپ وتكىم كەلەدى. بيىل ازەربايجاندا قازاقستاننىڭ مادەنيەت كۇندەرى وتەدى. بۇگىن ءبىز قۇرمەتتى ازەربايجان پرەزيدەنتىمەن بىرگە كورنەكتى مەملەكەت قايراتكەرى گەيدار اليەۆ اتىنداعى كوشەنى اشامىز. بۇل يگى شارا ازەربايجان حالقىنىڭ ءبىرتۋار پەرزەنتىنىڭ ءجۇز جىلدىعىنا وراي وتكىزىلىپ وتىر. ەلدەرىمىزدىڭ شىنايى دوستىعى مەن ءوزارا قولداۋىنىڭ تاعى ءبىر ايقىن دالەلى - قازاق حالقىنىڭ ازەربايجانعا تارتۋى فيزۋلي قالاسىنداعى قۇرمانعازى اتىنداعى بالالار شىعارماشىلىق ورتالىعى. بۇل نىساننىڭ قۇرىلىسى قارقىندى ءجۇرىپ جاتقانى جونىندە ماعان مالىمدەدى. وسى ماڭىزدى نىساننىڭ ىسكە قوسىلۋىن جۋىق ارادا كورە الامىز دەپ ويلايمىن. ءبىز گۋمانيتارلىق بايلانىستاردى جان-جاقتى دامىتىپ، ورتاق رۋحاني جانە مادەني قۇندىلىقتاردى بايىتۋعا نيەتتىمىز»، - دەدى قاسىم-جومارت توقايەۆ.
