ماسا ارقىلى جۇعاتىن اۋرۋلاردان قالاي ساقتانۋعا بولادى؟

استانا. قازاقپارات - دۇنيەجۇزىلىك دەنساۋلىق ساقتاۋ ۇيىمى ماسا ارقىلى جۇعاتىن ۆيرۋستىق ينفەكتسيالاردىڭ كوبەيگەنىن ايتىپ، دابىل قاعۋدا.

ب ب ۇ جاڭالىقتار ورتالىعى تاراتقان مالىمەتكە سۇيەنسەك، ولاردىڭ قاتارىندا دەنگە مەن چيكۋنگۋنيا ۆيرۋستىق ينفەكسيالارى الەم ەلدەرىندە كۇرت ءوسىپ وتىر.

د د س ۇ بۇل ۆيرۋستاردىڭ تەز تارالۋىنا جاھاندىق جىلىنۋ اسەر ەتۋى مۇمكىندىگىن ايتۋدا. سونداي-اق جاۋىن-شاشىننىڭ مولشەردەن كوپ جاۋۋى دا ماسالاردىڭ كوبەيۋىنە قولايلى ورتا قالىپتاستىرادى. كليماتتىڭ وزگەرۋى ۆيرۋستى تاسىمالداۋشىلار ءۇشىن بۇعان دەيىن ولار تابيعي مەكەندەمەگەن وڭىرلەرگە تارالۋعا سەبەپ بولادى.

دەنگە

د د س ۇ دەرەكتەرى بويىنشا، دەنگە ۆيرۋسىن جۇقتىرۋدىڭ 2000 -جىلى 505 مىڭ جاعدايى تىركەلسە، 2019 -جىلى 5,2 ميلليونعا دەيىن وسكەن. ال 2022 -جىلى لاتىن امەريكاسى ايماعىندا كورسەتكىش 2,8 ميلليون جاعدايعا جەتىپ، 1280 ءولىم ورىن الدى. 2023 -جىلى دا كوبەيۋ ءۇردىسى توقتاماي تۇر.

اسىرەسە بوليۆيا، پاراگۆاي مەن پەرۋدە جاعداي مۇشكىل. ازياداعى جاعداي دا كوڭىل الاڭداتادى.

دەنگە قىزباسى - ماسالار تاراتاتىن ەڭ كوپ تارالعان ينفەكتسيالاردىڭ ءبىرى. كوبىنەسە ۆيرۋس تروپيكالىق جانە سۋبتروپيكالىق كليماتتا كەزدەسەدى. دەنگە قىزباسىن جۇقتىرعانداردىڭ باسىم كوپشىلىگىندە اۋرۋ سيمپتومسىز تۇردە وتەدى. ال ەگەر بايقالعان جاعدايدا اۋرۋعا ءتان بەلگىلەر: دەنە قىزۋىنىڭ كوتەرىلۋى، باس اۋرۋى، دەنەنىڭ اۋىرسىنۋى، جۇرەك اينۋ مەن بورتپە.

چيكۋنگۋنيا

چيكۋنگۋنيا پاراگۆاي، ارگەنتينا مەن بوليۆيادا كوپ تارالعان. سونداي-اق برازيليا مەن لاتىن امەريكاسى وڭىرىندە كەزدەسەدى.

بۇل ۆيرۋسپەن قاتار كەيدە مەنينگوەنتسەفاليت پەن نەوناتالدىق ءولىم-ءجىتىم جاعداي دا ورىن الۋى ىقتيمال. اۋرۋعا اسىرەسە ديابەت، گيپەرتونيامەن اۋىراتىن، يممۋنيتەتى ءالسىز 60 جاستان اسقان ادامدار بەيىم كەلەدى.

چيكۋنگۋنيا كەزىندە دە قىزبا مەن بۋىندار اۋىرىپ، تامىرلار ءىسىنىپ، بۇلشىقەتتىڭ اۋىرسىنۋى، باس اۋرۋى، جۇرەك اينۋ، شارشاعىشتىق پەن بورتپە ورىن الادى.

چيكۋنگۋنياعا قارسى ەم نەمەسە ۆاكسينا ءالى كۇنگە ويلاپ تابىلعان جوق.

زيكا

د د س ۇ زيكا قىزباسىن جۇقتىرعاندار سوڭعى كەزدە اجەپتاۋىر ازايعانىن اتاپ ءوتتى. 2017 -جىلى 50 مىڭ جاعداي تىركەلسە، 2018 -جىلى - 30 مىڭ ادام ۆيرۋستى جۇقتىرعان.

2023 -جىلعى سوڭعى مالىمەتتەرگە كوز جۇگىرتسەك، رەسمي تۇردە زيكانىڭ تەك 3 مىڭ جاعدايى تىركەلگەن. ولار: برازيليا، بوليۆيا، گۆاتەمالا، بەليزا مەن كولۋمبيادا انىقتالعان.

زيكا قىزباسى دا لاتىنامەريكالىق ەلدەرگە ءتان اۋرۋ. جۇكتى ايەلدەر ءۇشىن اسا قاۋىپتى ۆيرۋس ميكروتسەفالياعا جانە بالانىڭ تۋابىتكەن اقاۋلارىنا اكەلۋى مۇمكىن.

ينفەكتسيانىڭ سونىمەن قاتار گييەنا- باررە سيندرومى، نەۆروپاتيا جانە ميەليت سىندى نەۆرولوگيالىق اسقىنۋلاردىڭ دامۋىنا سەبەپ بولۋ قاۋپى جوعارى.

ساقتىق شارالارى

بۇل ۆيرۋستىق اۋرۋلاردىڭ الدىن الۋ ەڭ قاراپايىم ءتاسىلى - ماسا شاعۋدى بولدىرماۋ.

د د س ۇ دەنەنىڭ كوپ بولىگىن جاۋىپ تۇراتىن اشىق ءتۇستى ۇزىن كيىم كيىپ، ماسا شاعۋدان قورعايتىن قۇرالداردى قولدانىپ، ماسادان قورعايتىن تورشا ورناتىلعان عيماراتتا ۇيىقتاۋعا كەڭەس بەرەدى.