قاپشاعايعا دەمالۋعا بارعان ءۇش جىگىت توبەلەسىپ، اۋرۋحاناعا ءتۇستى

قونايەۆ. قازاقپارات - قاپشاعاي جاعالاۋىندا دەمالماق بولعان ەر ادامدار جەكەمەنشىك نىساننىڭ يەسى جانە جۇمىسشىلارىمەن توبەلەسىپ قالدى، دەپ حابارلايدى قازاقپارات ءتىلشىسى.

الماتى وبلىسى پوليتسيا دەپارتامەنتىنىڭ مالىمەتى بويىنشا، 8-ساۋىردە ساعات 19:03-تە قونايەۆ قالالىق پوليتسيا باسقارماسىنا اۋرۋحاناعا ءتۇرلى دەنە جاراقاتى بار ءۇش ەر ادامنىڭ تۇسكەنى حابارلانعان. وسى حابارلاماعا سايكەس، ق ر ق ك 293-بابىنىڭ 2-بولىگى 1-تارماعىندا كوزدەلگەن «بۇزاقىلىق» قىلمىستىق قۇقىق بۇزۋشىلىق قۇرامى بەلگىلەرى بويىنشا ءىس تىركەلدى.

تەرگەۋ بارىسىندا زارداپ شەككەندەر قاپشاعاي جاعالاۋىنا دەمالىسقا كەلىپ، جەكە اۋماققا زاڭسىز كىرگەنى انىقتالدى. اتالعان اۋماقتىڭ مەنشىك يەسى مەن جۇمىسشىلارى ەر ادامدارمەن سوزگە كەلىپ، سوڭى توبەلەسكە ۇلاسقان. وقيعا ورنىنا پوليتسيا جاساعى جىبەرىلدى.

«وقيعاعا قاتىسۋشىلار ءمان-جايدى انىقتاۋ ءۇشىن پوليتسيا باسقارماسىنا جەتكىزىلدى. ءىس بويىنشا سوتقا دەيىنگى تەرگەۋدىڭ تولىقتىعىن قامتاماسىز ەتۋگە باعىتتالعان بارلىق قاجەتتى تەرگەۋ ارەكەتتەرى جۇرگىزىلىپ جاتىر. ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى»، - دەپ حابارلادى پوليتسيادان.