قازاقستاندىق جەلاياق، الەم چەمپيونى نورا دجەرۋتو دوپينگ داۋىنا ىلىكتى
وسىلايشا 27 جاستاعى جەلاياق الدا بولاتىن جارىستاردان ۋاقىتشا شەتتەتىلىپ وتىر. مۇنداي شەشىمدى جەڭىل اتلەتيكاداعى جاعىمسىز قۇبىلىستارمەن كۇرەسەتىن تاۋەلسىز ورگان Athletics Integrity Unit (AIU) قابىلداعان.
AIU سايتىندا نورا دجەرۋتونىڭ كۇدىككە ىلىنگەنى تۋرالى جازبا 5- ساۋىردە بەرىلگەنى ايتىلعان. تاعىلىپ وتىرعان كۇدىكتىڭ ەگجەي- تەگجەيى تۋرالى مالىمەتتە: «تىيىم سالىنعان ءزاتتى/تاسىلدى (ABP) قولدانۋ (2.2 باپ)»، - دەگەن سيپاتتام بەرىلگەن.
كەنيا تۋماسى قازاقستانعا 2017 -جىلى قونىس اۋدارىپ، 2019 - 2022 -جىلدار ارالىعىندا قازاقستان اتىنان جارىستارعا قاتىسۋ قۇقىعىن راسىمدەۋمەن اينالىستى. وعان دەيىن وسكەمەندە ىرگەسى قالانعان Altay Athletics كلۋبىنىڭ اتىنان سىنعا ءتۇسىپ ءجۇردى.
بىلتىردان بەرى قازاقستان اتىنان رەسمي جارىستارعا قاتىسا باستاعان سپورتشى 3000 مەتر قاشىقتىققا كەدەرگىلەرمەن جۇگىرۋ سايىسىندا الەم چەمپيونى اتانعان بولاتىن. بۇل قازاقستاننىڭ اتالعان سپورت تۇرىنەن الەم بىرىنشىلىگىندە يەلەنگەن العاشقى التىن مەدالى.
