قاسىم- جومارت توقايەۆ: سىرتقى ساياساتىمىز ءاردايىم دەربەس بولادى
«قازاقستان - ءوز گەوساياسي ايماعىندا وسىنداي اۋقىمدى رەفورمالار جاساپ جاتقان بىردەن- ءبىر ەل. جاڭارتىلعان كونستيتۋتسيا جانە ەلىمىزدە بولىپ جاتقان وزگەرىستەر - وسىنىڭ ايقىن دالەلى.
ءبىز وسى رەفورمالاردى، جالپى ايتقاندا، وسى ساياساتتى مىندەتتى تۇردە جالعاستىرامىز. الدىمىزدا تۇرعان نەگىزگى ماقسات - ەگەمەندىگىمىزدى نىعايتۋ جانە ۇلتتىق مۇددەمىزدى قامتاماسىز ەتۋ.
سوندىقتان ەلىمىز حالىقارالىق ىنتىماقتاستىقتى بەلسەندى تۇردە جالعاستىرا بەرەدى، سىرتقى ساياساتىمىز ءاردايىم دەربەس بولادى. ءبىز مۇنىڭ بارىنە مىزعىماس بىرلىكتىڭ ارقاسىندا قول جەتكىزىپ وتىرمىز. قانداي قيىن بولسا دا، بۇل جولدان تايماۋىمىز كەرەك. العا قاراي قادام باسساق قانا، جولىمىز اشىق بولادى. وسىلايشا، قازاقستان، شىن مانىندە، وركەنيەتتى، جاسامپاز جانە وزىق ەل بولماق»، - دەدى مەملەكەت باسشىسى.
مەملەكەت باسشىسى قاسىم- جومارت توقايەۆ ادامزاتقا مەيىرىمدىلىك، جاناشىرلىق، قامقورلىق سياقتى قاسيەتتەر جەتىسپەي جاتقانىن ايتتى.
«ءبارىمىز دە - مۇسىلمان بالاسىمىز. حاق ءدىنىمىزدىڭ قۇندىلىقتارىن بىلەمىز. ونى ساقتاۋعا، ومىرلىك ۇستانىم ەتۋگە تىرىسامىز.
قازىرگى جاھاندىق احۋالدى بارشاڭىز كورىپ وتىرسىزدار. بۇل احۋال اسا كۇردەلى، ءتىپتى قاۋىپتى دەسەك قاتەلەسپەيمىز. سىن- قاتەرلەر وتە كوپ. مەيىرىمدىلىك، جاناشىرلىق، قامقورلىق سياقتى قاسيەتتەر جەتىسپەي جاتىر. ادامزات ءۇشىن وتە قاۋىپتى بۇل ءۇردىستى توقتاتۋعا ءبارىمىز كۇش سالۋىمىز كەرەك. ول ءۇشىن وسى اسىل قاسيەتتەردى ءارقايسىمىز جۇرەگىمىزدە ساقتاۋىمىز قاجەت دەپ سانايمىن. سونداي- اق ونى كۇندەلىكتى ءىس- ارەكەتپەن، كوركەم مىنەزبەن كورسەتكەن ابزال. مەنىڭشە ءار مۇسىلمان ءۇشىن قاسيەتتى رامازان ايىنىڭ ءمان- ماڭىزى - وسىندا.
بارشاڭىزعا اماندىق تىلەيمىن!
ەلىمىزدىڭ بەرەكە- بىرلىگى ارتا بەرسىن!
دۇعا- تىلەكتەرىڭىز قابىل بولسىن!»، - دەدى پرەزيدەنت.
ايتا كەتەيىك، بۇگىن «اقوردا» رەزيدەنسياسىندا مەملەكەت باسشىسىنىڭ اتىنان بەرىلگەن اۋىزاشارعا مەملەكەت جانە قوعام قايراتكەرلەرى، عالىمدار، دارىگەرلەر، مۇعالىمدەر، ەتنومادەني بىرلەستىكتەردىڭ وكىلدەرى، ديپلوماتيالىق وكىلدىكتەردىڭ باسشىلارى، مادەنيەت قايراتكەرلەرى، قۇتقارۋشىلار، ەڭبەك ادامدارى قاتىستى.
