پرەزيدەنت ۇلتتىق كيىمدى ناۋرىز مەيرامىنان تىس كۇندەرى دە كيىپ جۇرۋگە شاقىردى
«حاكىم اباي «ادامزاتتىڭ ءبارىن ءسۇي باۋىرىم دەپ» دەگەنىن بىلەسىزدەر. ۇلى ابايدىڭ بۇل ءسوزى ۇلت ۇستانىمىنا اينالدى.
ءبىز ۇلتتىق مادەنيەتتى دامىتۋىمىز كەرەك. ۇلتتىق مادەنيەت دەگەنىمىز بۇل - ماعىناسى تەرەڭ، كوپقىرلى ۇعىم. حالقىمىزدىڭ ءتول مادەنيەتى سالت- داستۇردەن، ادەت- عۇرىپتان باستاۋ الادى. ۇلتتىق كيىمنىڭ ءوزى - ۇلت مادەنيەتىنىڭ جارقىن كورىنىسى. سوندىقتان ۇل- قىزدارىمىز ۇلتتىق كيىمدى ناۋرىز مەيرامىندا يا بولماسا باسقا مەرەكەلەردە عانا ەمەس، ءجيى كيىپ جۇرسە كەرەمەت بولار ەدى. تەك مەرەكەدە ەمەس، ۇدايى كيىپ جۇرسە دە، جاراسىمدى بولاتىنى ءسوزسىز.
جالپى ۇلت مادەنيەتى - حالىق ءومىرىنىڭ ايناسى، ونىڭ بولمىسى. ەلىمىزدىڭ رۋحاني دامۋى ۇلتتىق رۋحقا تىكەلەي بايلانىستى»، - دەدى ق. توقايەۆ.
سونداي- اق مەملەكەت باسشىسى وسكەلەڭ ۇرپاقتىڭ رۋحاني تاربيەسىنە ەرەكشە كوڭىل ءبولۋ قاجەتتىگىن اتاپ ءوتتى.
«قازاقتىڭ ادەت- عۇرپى ءاردايىم ىزگىلىككە شاقىرادى. ءاربىر سالتتىڭ تەرەڭ تاربيەلىك ءمانى بار. مىسالى، اقساقالدارىمىز جاستارعا باتاسىن بەرەدى. جاستارىمىز ۇلكەننىڭ الدىن كەسىپ وتپەيدى، قۇرمەتىن كورسەتەدى، ەشكىمنىڭ الا ءجىبىن اتتامايدى.
حالقىمىز قاشاندا قىز بالانى سىيلاپ، قادىرلەگەن. مۇنىڭ ءبارى ءداستۇرلى يسلام قۇندىلىقتارىمەن تىعىز ۇندەسەدى. وسىنى جاستارعا ءتۇسىندىرۋ قاجەت.
جۇرتتىڭ ءدىني ساۋاتىن ارتتىرۋ كەرەك. ازاماتتارىمىز شىنايى يسلامنىڭ قۇندىلىقتارىن بىلۋگە ءتيىس. سول قۇندىلىقتاردى حالىق اراسىندا ءتۇسىندىرىپ، دارىپتەۋ قاجەت. اسىرەسە وسكەلەڭ ۇرپاقتىڭ رۋحاني تاربيەسىنە ەرەكشە كوڭىل بولگەن ءجون. كوزى اشىق، كوكىرەگى وياۋ، ءبىلىمدى، ساناسى سەرگەك ۇرپاق ۇلتقا ادال قىزمەت ەتەدى»، - دەدى ق ر پرەزيدەنتى.
