شەتەلدىك تۋريستەر قازاقستاننىڭ قاي وڭىرلەرىن تاڭدايدى - مينيسترلىك جاۋابى

استانا. قازاقپارات - مادەنيەت جانە سپورت مينيسترلىگى شەتەلدىك تۋريستەر قانداي وڭىرلەرگە ءجيى كەلەتىنىن اتادى، دەپ حابارلايدى قازاقپارات.

مادەنيەت جانە سپورت مينيسترلىگىنىڭ مالىمەتىنشە، وتكەن جىلى ماڭعىستاۋ وبلىسىنا 41 مىڭنان استام شەتەلدىك تۋريست كەلگەن. ورتاشا العاندا، شەتەلدەن كەلگەن قوناقتار كاسپي تەڭىزىنىڭ جاعالاۋىندا 7-12 كۇن ارالىعىندا بولعان.

سونداي-اق ەلىمىزدەگى دەمالىس مەرزىمىنىڭ ۇزاقتىعى بويىنشا العاشقى ۇشتىككە الماتى جانە استانا قالالارى ەندى. 2022-جىلى الماتىعا 417 مىڭنان استام شەتەلدىك قوناق كەلدى. ورتاشا العاندا تۋريستەر وڭتۇستىك استانادا 3-5 كۇن وتكىزگەن.

بىلتىر استاناعا 238 مىڭنان استام شەتەلدىك تۋريست كەلدى. ەلوردادا ولار ورتا ەسەپپەن 2-3 كۇن بولدى.

ال شەتەلدەن كەلگەن تۋريستەردىڭ قازاقستاندا ساياحاتتاۋ مەرزىمىنىڭ ورتاشا ۇزاقتىعى 4 كۇندى قۇرايدى.

«ساپاردىڭ ۇزاقتىعى ءوڭىردىڭ تۋريستىك تارتىمدىلىعىن كورسەتەدى. ماڭعىستاۋ وبلىسىنىڭ الەۋەتى وتە زور جانە ءبىز ونى تولىعىمەن ىسكە اسىرۋ باعىتىندا بەلسەندى جۇمىس ىستەپ جاتىرمىز. مامانداردى دايارلاۋ جانە وقىتۋ، تۋريستىك ينفراقۇرىلىم سالۋ، جاڭا تىكەلەي اۆيارەيستەر اشۋ بويىنشا كەلىسسوزدەر جۇرگىزىلىپ جاتىر. شەتەلدىكتەر اراسىندا سۇرانىس ۇلكەن. سول سەبەپتى ەلىمىزگە كەلەتىن شەتەلدىك تۋريستەردىڭ سانىن ارتتىرۋ بويىنشا جۇمىستى جالعاستىرامىز»، - دەدى ق ر مادەنيەت جانە سپورت ۆيتسە-ءمينيسترى ەرجان ەركىنبايەۆ.