قاسىم-جومارت توقايەۆ ءبىرقاتار مەملەكەتتىڭ ەلشىلەرىنەن سەنىم گراموتاسىن قابىلدادى
«اقوردا» رەزيدەنتسياسىندا ءتورت مەملەكەتتىڭ توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى.
سەنىم گراموتالارىن مالايزيا ەلشىسى موحاماد ادلي بين ابدۋللا، ساۋد ارابياسى كورولدىگىنىڭ ەلشىسى فايسال بەن حانيف ءال-كاحتاني، تۇركيا رەسپۋبليكاسىنىڭ ەلشىسى مۋستافا كاپۋدجۋ جانە يران يسلام رەسپۋبليكاسىنىڭ ەلشىسى ءالي اكبار دجوۋكار تاپسىردى.
مەملەكەت باسشىسى ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتادى.
قاسىم-جومارت توقايەۆ ديپلوماتتار ءوز مىندەتتەرىن ورىنداۋ كەزىندە قازاقستان ۇكىمەتى ولارعا جان-جاقتى قولداۋ كورسەتەتىنىن اتاپ ءوتىپ، ەلىمىزدىڭ اتالعان مەملەكەتتەرمەن ساياسي، ەكونوميكالىق بايلانىستاردى قوسا العاندا، بارلىق سالادا تىعىز قارىم-قاتىناس ورناتقان ستراتەگيالىق سەرىكتەس ەكەنىن جەتكىزدى.
سونىمەن قاتار قازاقستان حالىقارالىق ىنتىماقتاستىققا ءاردايىم اشىق ەكەنىن ايتتى.
ءراسىم سوڭىندا پرەزيدەنت ەلشىلەردىڭ الداعى قىزمەتىنە تابىس تىلەپ، ولاردىڭ مەملەكەتتەرىنىڭ باسشىلارىنا ىزگى تىلەگى مەن سالەمىن جولدادى.
