ءبىرقاتار ەلدە سۋدى پايدالانۋدا شەكتەۋ ەنگىزىلدى

استانا. قازاقپارات- ەۋروپادا اۋىز سۋدىڭ تورتتەن ءبىر بولىگى ىسىراپ ەتىلەدى. ىسىراپقا ناشار ينفراقۇرىلىم مەن سۋ رەسۋرستارىن دۇرىس پايدالانباۋى سەبەپ. سوندىقتان سۋدى ۇنەمدەۋ تۋرالى ءجيى ايتىلىپ جاتىر.

قۇرعاقشىلىقتان ەۋروپا عانا ەمەس، ازيا مەن افريكا ەلدەرى دە زارداپ شەگىپ وتىر. ءبىراز ەلدە سۋدى پايدالانۋعا شەكتەۋ شارالارى ەنگىزىلدى. سۋدى ۇنەمدەۋ شارالارىن قولعا العان ەلدەردىڭ قاتارىندا ۇلى بريتانيا بار. ءسويتىپ 2038-جىلعا تامان ونى تۇتىنۋ مولشەرىن 20 پروتسەنتكە ازايتۋ كوزدەلىپ وتىر. ال 2050 -جىلى ءاربىر بريتاندىق كۇنىنە تىرشىلىك ءنارىنىڭ ارى كەتسە 110 ليترىن عانا قولدانا الادى. ۇنەمدەۋ ماقساتىندا سۋمەن قامتاماسىز ەتۋ جۇيەلەرىندە جاڭا ستاندارتتار ەنگىزۋ دە قاراستىرىلعان.

فرانسيا

فرانسيا پرەزيدەنتى 2030 -جىلعا تاياۋ ەكونوميكانىڭ بارلىق سەكتورىندا سۋدى تۇتىنۋ مولشەرىن 10 پروتسەنتكە ازايتۋدى تالاپ ەتىپ وتىر. جاقىندا ول سۋ رەسۋرستارىن ساقتاۋ جونىندەگى جالپى ۇلتتىق جوسپاردى جاريا ەتتى. وعان سايكەس، تىرشىلىك كوزىن تۇتىنۋ تاريفتەرىن كوتەرۋ قاراستىرىلعان. سۋمەن قامتاماسىز ەتۋ جۇيەلەرىن جەتىلدىرۋ جاعى دا كوزدەلىپ وتىر. جالپى فرانسيا بىرنەشە جىل قۋاڭشىلىق زاردابىن تارتىپ كەلدى. بيىل جازدا جاعداي قايتالانۋى مۇمكىن دەگەن بولجام بار.

قىتاي

قىتاي بيلىگى دە تىرشىلىك ءنارىن ۇتىمدى پايدالانۋ جاعىنا كوپ كوڭىل ءبولىپ وتىر. ءسويتىپ، ەلدەگى ەڭ ءىرى وزەن - يانتسزىدى قورعاۋ بويىنشا قاتاڭ شارالار قولعا الىندى. ويتكەنى وعان ەكونوميكانىڭ ماڭىزدى سەكتورى - اۋىل شارۋاشىلىعى تاۋەلدى. ءسويتىپ الداعى ۋاقىتتا يانتسزى وزەنىنىڭ باسسەينىندە ۇزىندىعى 64 مىڭ شاقىرىمنان اساتىن دامبالار سالىنىپ، 300 ءىرى سۋقويما پايدا بولادى.

تۋنيس

قۋاڭشىلىقتان اسىرەسە افريكا ەلدەرى قاتتى زيان شەگىپ وتىر. بۇل رەتتە تۋنيس بيلىگى سۋدى تۇتىنۋ بويىنشا شەكتەۋلەر ەنگىزدى. تازا اۋىز سۋدى اۋىل شارۋاشىلىعى قاجەتتەلىكتەرىنە قولدانۋعا بولمايدى. ونىمەن قوعامدىق ورىنداردى تازالاپ، كولىك جۋۋعا دا رۇقسات جوق. ەرەجە 30-قىركۇيەككە دەيىن كۇشىن جويمايدى. تالاپقا باعىنباعاندارعا ايىپپۇل سالىنادى. كەرەك دەسەڭىز، 6 ايعا دەيىن باس بوستاندىعىنان ايىرىلۋى مۇمكىن. افريكاداعى بۇل مەملەكەت وسىمەن ءتورتىنشى جىل قۋاڭشىلىقتان زارداپ شەگىپ وتىر. جاۋىن- شاشىن جاۋماعاسىن، ەلدەگى تازا اۋىز سۋدىڭ قورى 30 پروتسەنتكە دەيىن ازايعان.

www.24.kz