پرەزيدەنت وتاندىق مۇناي سالاسىنا ەڭبەك سىڭىرگەن ءبىر توپ ادامدى ماراپاتتادى
قازاقپارات بۇل تۋرالى اقورداعا سىلتەمە جاساپ حابارلايدى.
پرەزيدەنت «شيەۆرون» كورپوراتسياسى قازاقستانمەن بىرلەسكەن كاسىپورىن اشقان العاشقى شەتەل كومپانياسى ەكەنىن اتاپ ءوتىپ، كومپانيانىڭ 30 جىلدىق مەرەيتويى ەلىمىزدىڭ مۇناي-گاز سالاسى ءۇشىن ايتۋلى وقيعا ەكەنىن ايتتى.
«بۇگىندە «تەڭىزشيەۆرويل» جەتەكشى حالىقارالىق كومپانيا رەتىندە ەلىمىزدىڭ جالپى ەكونوميكالىق دامۋىنا تابىستى ۇلەس قوسىپ كەلەدى. ەلىمىزدە وندىرىلەتىن مۇنايدىڭ ۇشتەن ءبىرى «تەڭىزشيەۆرويلعا» تيەسىلى. كومپانيا وتىز جىل ىشىندە 70 ميلليارد دوللار ينۆەستيتسيا قۇيىپ، مەملەكەت بيۋجەتىنە 160 ميلليارد دوللاردان استام كىرىس اكەلدى. كومپانيا تاۋارلار مەن قىزمەتتەردىڭ 70 پايىزىن جەرگىلىكتى ءونىم جەتكىزۋشىلەردەن ساتىپ الادى. «تەڭىزشيەۆرويل» جۇمىسشىلارىنىڭ 95 پايىزدان استامى - قازاقستان ازاماتتارى»، - دەدى پرەزيدەنت.
مەملەكەت باسشىسىنىڭ ايتۋىنشا، كومپانيا مۇناي سالاسىندا وزىق تەحنولوگيالاردى بەلسەندى تۇردە قولدانىپ، كومىرسۋتەگى بەيتاراپتىعىنا قول جەتكىزۋگە سەپتىگىن تيگىزەتىن شارالاردى دايەكتى تۇردە قابىلداپ جاتىر.
«2000 جىلدان بەرى كومپانيا اۋاعا تارالاتىن شىعارىندىلاردىڭ كولەمىن 75 پايىزعا ازايتتى. بۇل باعىتتاعى جۇمىس جالعاسۋعا ءتيىس. تەڭىز كەن ورنىنداعى ءوندىرىستى اۋقىمدى تۇردە كەڭەيتۋ جوبالارىنىڭ جۇزەگە اسىرىلۋى اياقتالىپ كەلەدى. بۇل ەلىمىزگە مۇناي ءوندىرىسىنىڭ كولەمىن تاعى دا 12 ميلليون تونناعا ارتتىرىپ، الەمدەگى ەڭ ءىرى مۇناي جەتكىزۋشى ەلدەردىڭ قاتارىنا كىرۋگە مۇمكىندىك بەرەدى»، - دەدى ق. توقايەۆ.
مەملەكەت باسشىسى جاڭا شاقىرىلىمداعى پارلامەنتتىڭ ءبىرىنشى سەسسياسىندا سويلەگەن سوزىندە شاعىن جانە ورتا بيزنەستى دامىتۋ ماسەلەسىنە باسا نازار اۋدارعانىن اتاپ ءوتتى. ونىڭ پىكىرىنشە، «تەڭىزشيەۆرويل» بۇل باعىتتا دا ماڭىزدى ءرول اتقارادى. كومپانيانىڭ اۋقىمدى وندىرىستىك قۋاتىنىڭ ارقاسىندا ءارتۇرلى سالادا جۇزدەگەن جاڭا كاسىپورىننىڭ پايدا بولۋىنا ەكونوميكالىق نەگىز قالاندى. سونىڭ ناتيجەسىندە ون مىڭداعان جۇمىس ورنى اشىلدى.
بۇدان بولەك، پرەزيدەنت «تەڭىزشيەۆرويلدىڭ» الەۋمەتتىك جاۋاپكەرشىلىگى تۋرالى ايتتى. كاسىپورىن وتىز جىلدا 100 دەن استام ءىرى الەۋمەتتىك جوبانى ىسكە اسىرعان. اتاپ ايتقاندا، مەكتەپتەر، بالاباقشالار، اۋرۋحانالار مەن باسقا دا نىسانداردىڭ قۇرىلىسىنا قوماقتى قارجى بولگەن.
جيىن سوڭىندا پرەزيدەنت وتاندىق مۇناي سالاسىنا سىڭىرگەن ەرەكشە ەڭبەگى ءۇشىن ءبىرقاتار ەڭبەك ارداگەرى مەن كومپانيا قىزمەتكەرلەرىن مەملەكەتتىك ناگرادالارمەن ماراپاتتادى.
«قۇرمەت» وردەنىمەنەڭبەك ارداگەرلەرى جانۇزاق ورازوۆ، جەڭىس سەيتايەۆ، كوبەنتاي سۇيەسىنوۆ، III دارەجەلى «ەڭبەك داڭقى» وردەنىمەن ەڭبەك ارداگەرلەرى مۇحيت ابىلعازيەۆ، مىرزاقۋات قارابالين، لەونيد توروپكين، ايتقالي ۇيپاقوۆ، «ەرەن ەڭبەگى ءۇشىن» مەدالىمەن «تەڭىزشيەۆرويل» ج ش س ەكىنشى بۋىنداعى زاۋىتىنىڭ باسقارۋشىسى دانيار بيجانوۆ، ەڭبەك ارداگەرلەرى بولات ەرنيازوۆ، ورىنباي جاكيەۆ، «تەڭىزشيەۆرويل» ج ش س بىرىكتىرىلگەن ءوندىرىستى باسقارۋ ورتالىعىنىڭ باسشىسى رۋسلان ينەبايەۆ، قازاقستان رەسپۋبليكاسى پرەزيدەنتىنىڭ قۇرمەت گراموتاسىمەن «تەڭىزشيەۆرويل» زاۋىتىنىڭ باسشىسى نۇرلان بەكتايەۆ ناگرادتالدى.
