جانارماي باعاسىنىڭ وسۋىنە قانداي سەبەپتەر اسەر ەتۋدە
«ەلىمىزدەگى ءۇش مۇناي وڭدەۋ زاۋىتىندا جاڭعىرتۋ جۇمىستارى اياقتالعاننان كەيىن، مۇناي وڭدەۋ كولەمى 3 ميلليون تونناعا ءوستى. قازىر جىلىنا شامامەن 17 ميلليون توننا شيكى مۇناي وندەلىپ جاتىر (بيتۋم زاۋىتىن قوسپاعاندا). كەيىنگى 5 جىلدا بەنزين شىعارۋ كولەمىن %70 عا (3 ميلليون توننادان 5 ميلليونتونناعا دەيىن)، ديزەل وتىنىن %30 عا وسىردىك (جىلىنا 4 ميلليوننان 5,2 ميلليون تونناعا دەيىن). بىلتىر ديزەل وتىنىن ءوندىرۋ بويىنشا رەكوردتىق كورسەتكىشكە، ياعني 5,2 ميلليون تونناعا جەتسەك تە، قازىرگى جاعدايدا ەلىمىزدىڭ ءبىرقاتار وڭىرىندە ديزەل تاپشىلىعى بار. 350 مىڭ توننا كولەمىندەگى تاپشىلىقتى (قىسقى دت قوسپاعاندا) قىمبات يمپورتتىق وتىنمەن جابۋعا ءماجبۇر بولدىق. وسى ورايدا، ەكونوميكاداعى ماڭىزدى ونەركاسىپ سەكتورى بولىپ سانالاتىن تاۋ-كەن مەتتاللۋرگيا كەشەنى جانە تەمىرجول سالالارىنىڭ تۇتىنۋ كولەمى سول قالپىندا قالدى، ياعني وسكەن جوق»، - دەدى ب. اقشولاقوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
وسى ورايدا ول نارىقتاعى ديزەلگە سۇرانىستىڭ تۇراقتى ءوسۋ سەبەبىنىڭ نەگىزگى فاكتورى رەتىندە ترانزيتتىك كولىك اعىنى اسەر ەتىپ وتىرعانىن ايتتى. بۇدان باسقا، قازاقستاننان كورشىلەس ەلدەرگە ديزەل وتىنىن ءتۇرلى سحەما بويىنشا الىپ كەتىپ جاتىر.
«مامانداردىڭ ەسەپتەۋىنشە، بىلتىر شەتەلدىك ترانزيتتىك كولىككە قۇيىلعان ديزەل كولەمى شامامەن 150 مىڭ توننانى قۇرادى، بۇدان باسقا «سۇر» ەكسپورتپەن كەتكەن وتىننىڭ كولەمى شامامەن 200 مىڭ توننا بولدى. قازاقستاندا ديزەل وتىنى تاپشىلىعىنىڭ باستى سەبەبى - ول باعا بويىنشا ديسپروپورتسيا. وتاندىق وتىن باعاسى كورشى ەلدەرمەن سالىستىرعاندا ايتارلىقتاي ارزان. قازاقستان - الەمدەگى جانارمايى ارزان ون ەلدىڭ قاتارىندا. ماسەلەن، رەسەيدە ديزەل باعاسى ورتاشا ەسەپپەن ليترىنە 345 تەڭگە، بىزدەگى نارىق باعاسىنان %45 عا جوعارى. قىرعىزستانداعى باعا %64 عا جوعارى، ياعني ليترىنە 390 تەڭگە، وزبەكستاندا بىزبەن سالىستىرعاندا ەكى ەسەگە قىمبات - ليترىنە 480 تەڭگە»، - دەدى ءمينيستردىڭ مىندەتىن اتقارۋشى.
بۇدان بۇرىن حابارلانعانداي، قازاقستاندا بەنزين مەن ديزەل وتىنىنىڭ باعاسى وسەدى.
وسى ورايدا ءتيىستى بۇيرىقتىڭ جوباسى بۇگىن جاريالانادى.
