تۇركيادا جەر سىلكىنىسىنەن قۇتقارىلعان ءسابي ەكى ايعا تاياۋ ۋاقىتتان كەيىن اناسىمەن قاۋىشتى - ۆيدەو
دارىگەرلەر گيزەم (جۇمباق دەگەن ماعىنا بەرەدى) دەپ اتاپ كەتكەن ءۇش جارىم ايلىق ۆەتين بەگداش 6-اقپاندا حاتاي پروۆينسياسىندا بولعان ءزىلزالادان 128 ساعاتتان كەيىن امان تابىلعان ەدى.
سودان كەيىن ول بىردەن اۋرۋحاناعا جەتكىزىلىپ، ەش جەرىندە جاراقات جوق، دەنى ساۋ ەكەنى ناقتىلانعان سوڭ انكاراداعى اۋرۋحاناعا اۋىستىرىلعان.
وتباسى جانە الەۋمەتتىك قىزمەتتەر ءمينيسترى دەريا يانىك ءسابيدى اناسى ياسەمين بەگداش ەمدەلىپ جاتقان ادانا پروۆينتسياسىنا اپارىپ، ەكەۋىن كەزدەستىردى.
انا مەن ءسابيدىڭ قاۋىشقان ءساتى وتە اسەرلى بولدى.
نارەستە مەن اناسىنىڭ ءبىر- بىرىنە تۋىس ەكەنى دنق سىناماسى ارقىلى دالەلدەنگەن.
ءسابيدىڭ اكەسى مەن ەكى اعاسى 50 مىڭنان استام ادامنىڭ ءومىرىن قيعان جەر سىلكىنىسىنەن قازا تاپتى.
«بۇل نارەستە شىنىمەن عاجايىپ. ونىڭ امان قالعانىنا جانە دەنساۋلىعىندا ەشبىر كىنارات جوقتىعىنا كادىمگىدەي تاڭىرقادىق جانە قۋاندىق. بۇل راسىمەن دە جۇمباق. گيزەم ەندى ءبىزدىڭ دە ءسابيىمىز. انانى بالاسىمەن قاۋىشتىرۋ - الەمدەگى ەڭ اسىل ءىستىڭ ءبىرى. وسى قۋانىشقا ورتاق بولعانىمىزعا شۇكىرلىك ەتەمىن. قۇداي ولارعا ۇزاق تا باقىتتى عۇمىر بەرسىن، ەندى ءبىر- بىرىنەن ەشقاشان اجىراماسىن»، - دەگەن مينيستر مەملەكەتتىڭ اتالعان وتباسىنا ءارقاشان قولداۋ كورسەتەتىنىن ايتتى.
اۆتور
جانات قاپالبايەۆا
