كەلەر ۇرپاقتىڭ قانداي مەملەكەتتە ءومىر سۇرەتىنى ءبىزدىڭ بۇگىنگى شەشىمدەرىمىزگە تىكەلەي بايلانىستى - پرەزيدەنت

استانا. قازاقپارات - قوعامنىڭ دامۋى ءۇشىن پىكىر الۋاندىعى قاجەت. بۇل تۋرالى پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«دەپۋتات بولۋ - بيىك مانساپ ەمەس، بۇل - زور جاۋاپكەرشىلىك جانە ماڭىزدى مىندەت. سىزدەردى حالىق سايلادى. جۇرت وزدەرىڭىزگە سەنىم ارتىپ وتىر. ەل سەنىمى - ەل اماناتى. قادىرلى قاۋىم! بىزگە وراسان زور جاۋاپكەرشىلىك جۇكتەلگەن. بۇل - وتكەن تاريحتىڭ جانە بولاشاقتىڭ الدىنداعى جاۋاپكەرشىلىك. كەلەر ۇرپاقتىڭ قانداي مەملەكەتتە ءومىر سۇرەتىنى ءبىزدىڭ بۇگىنگى شەشىمدەرىمىزگە تىكەلەي بايلانىستى. ەلىمىزدىڭ ماقساتى ايقىن. بۇل - ادىلەتتى قازاقستاندى قۇرۋ»، - دەدى مەملەكەت باسشىسى.

پرەزيدەنت مۇنىڭ ءبارى ءبىر كۇندە جاسالاتىن شارۋا ەمەستىگىنە باسا نازار اۋدارتتى.

«بارشامىز تاباندى، ەڭبەكقور، بىلىكتى، ۇقىپتى، ءتارتىپتى بولۋىمىز كەرەك. ەڭ الدىمەن وتانشىل بولۋىمىز قاجەت. ۇلتتىڭ جانە مەملەكەتتىڭ مۇددەسى بارىنەن بيىك تۇرۋعا ءتيىس. ارينە، قوعامنىڭ دامۋى ءۇشىن پىكىر الۋاندىعى قاجەت. ءبىراق، ەلدىك ماسەلەلەرگە كەلگەندە «ءبىر جاعادان باس، ءبىر جەڭنەن قول شىعارا» بىلگەن ءجون. ەلىمىزدى وركەندەتۋ ءۇشىن ەڭبەك ەتۋ - بارشامىزدىڭ ازاماتتىق بورىشىمىز. ەندەشە، وتان الدىنداعى وسى پەرزەنتتىك پارىزىمىزعا ءاردايىم ادال بولايىق»، - دەدى قاسىم-جومارت توقايەۆ.

سونداي-اق، پرەزيدەنت قاسىم-جومارت توقايەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا «قازاقستان-2050» ستراتەگياسىن» تۇبەگەيلى قايتا قاراۋدى ۇسىندى، دەپ حابارلايدى قازاقپارات ءتىلشىسى.

«سونداي-اق، شالعايداعى اۋىل تۇرعىندارىنا وسى يگىلىكتىڭ ءبارى قولجەتىمدى بولادى. ول ءۇشىن مەملەكەتتىك قىزمەت، مەملەكەتتىك ستاتيستيكا جانە مەملەكەت كورسەتەتىن قىزمەتتەر تۋرالى زاڭدارعا وزگەرتۋلەر ەنگىزۋ قاجەت»، - دەگەن مەملەكەت باسشىسى مەملەكەتتىك جوسپارلاۋ جۇيەسىن جاڭعىرتۋ ماسەلەسىنە جەكە توقتالدى.

«سوڭعى جىلدارى الەمدە تەڭدەسسىز گەوساياسي، ەكونوميكالىق جانە تەحنولوگيالىق وزگەرىستەر بولدى. وسىعان وراي، ءبىزدىڭ كەيبىر ستراتەگيالىق قۇجاتىمىز وزەكتىلىگىن جوعالتتى. سوندىقتان «قازاقستان - 2050» ستراتەگياسىن» تۇبەگەيلى قايتا قاراۋ قاجەت. ياعني، بۇل قۇجاتتى قازىرگى جاھاندىق ۇدەرىستەردى ەسكەرە وتىرىپ، ەل دامۋىنىڭ ۇزاق مەرزىمگە ارنالعان باسىمدىقتارىن ايقىندايتىن ستراتەگياعا اينالدىرۋ كەرەك. جالپى، كەز- كەلگەن جۇمىس مۇقيات جوسپارلانۋى كەرەك. سوندا مەملەكەتتىك ساياسات ستراتەگيالىق سيپاتقا يە بولادى جانە تۇراقتى جۇزەگە اسىرىلادى. سونىمەن بىرگە ەلىمىز كەز كەلگەن سىن-قاتەرگە توتەپ بەرە الادى»، - دەدى قاسىم-جومارت توقايەۆ.

ايتا كەتەيىك، ەلوردادا VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى ءوتىپ جاتىر. جيىنعا مەملەكەت باسشىسى قاسىم-جومارت توقايەۆ قاتىسۋدا.