ق. توقايەۆ دەپۋتاتتار سايلاۋى تۋرالى: قانداي دا ءبىر ساياسي ۇيىمعا ارتىقشىلىق بەرىلگەن جوق

استانا. قازاقپارات - مەملەكەت باسشىسى قاسىم- جومارت توقايەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا كەزەكتەن تىس دەپۋتاتتار سايلاۋىندا پارتيالارعا، ۇمىتكەرلەرگە بىردەي مۇمكىندىك بەرىلگەنىن ءمالىم ەتتى، دەپ حابارلايدى قازاقپارات ءتىلشىسى.

«ۇگىت- ناسيحات كەزەڭىن جانە داۋىس بەرۋ بارىسىن اقپارات قۇرالدارى جان- جاقتى كورسەتتى.

پارتيالارعا، ۇمىتكەرلەرگە بىردەي مۇمكىندىك بەرىلدى. مۇنى وتاندىق جانە شەتەلدىك بايقاۋشىلار دا ايتىپ وتىر. قانداي دا ءبىر ساياسي ۇيىمعا ارتىقشىلىق بەرىلگەن جوق.

پرەزيدەنت ەشبىر پارتيانىڭ مۇشەسى ەمەس. وبلىس اكىمدەرى پارتيا بولىمشەلەرىنە جەتەكشىلىك ەتپەيدى. جوعارى لاۋازىمدى قىزمەتكەرلەر پارتيا تىزىمىندە بولعان جوق. ياعني، بارلىق پارتيالار سايلاۋعا بىردەي جاعدايدا قاتىستى»، - دەدى پرەزيدەنت.

سونداي- اق، مەملەكەت باسشىسى ساياسي پارتيالاردىڭ سايلاۋ الدىنداعى تەلەۆيزيالىق پىكىرتالاستارىنا توقتالدى.

«سايلاۋشىلار دا، ۇمىتكەرلەر دە ايرىقشا بەلسەندى بولدى. ساياسي پارتيالار ءار ايماقتا ەل نازارىن وزىنە اۋدارۋ ءۇشىن تارتىسقا ءتۇستى. بىرنەشە رەت تىكەلەي ەفيردە پارتيالار اراسىندا قىزۋ جانە ءتيىمدى پىكىرتالاس بولدى. بۇل - دەموكراتيالىق قوعام ءۇشىن قالىپتى ءۇردىس. مۇنىڭ ءبارى قازاقستاندا اشىق ازاماتتىق قوعامنىڭ نىعايىپ كەلە جاتقانىن كورسەتتى»، - دەدى قاسىم- جومارت توقايەۆ.

«رەفورمالارىمىز «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» قاعيداسىنا نەگىزدەلدى. بۇل قاعيدا - مەملەكەتىمىزدىڭ باستى تىرەگى.

رەفەرەندۋمنان كەيىن كونستيتۋتسيانىڭ جاڭا تالاپتارىنا ساي بيلىك تارماقتارىن تۇگەل جاڭعىرتۋعا كىرىستىك. حالىقتىڭ دا كوپتەن كۇتكەنى وسى ەدى. كونستيتۋتسيالىق وزگەرىستەرگە سايكەس پرەزيدەنت سايلاۋى، سەنات، ءماجىلىس جانە ءماسليحاتتار سايلاۋى ءوتتى.

رەفەرەندۋمدى قوسقاندا ءبىر جىلعا جۋىق ۋاقىتتىڭ ىشىندە وتە ماڭىزدى 5 ساياسي ناۋقان وتكىزىلدى. ونىڭ ءبارى اسا كۇردەلى كەزەڭگە تۇسپا- تۇس كەلدى. قانشالىقتى كۇردەلى بولسا دا، ءبىز ەلىمىز ءۇشىن وتە قاجەت جولدى قىسقا مەرزىم ىشىندە ءجۇرىپ وتتىك. قازاقستاننىڭ جاڭارىپ، جاڭعىرا باستاعانىنا جۇرتتىڭ كوزى جەتتى»، - دەدى پرەزيدەنت.

مەملەكەت باسشىسى كەشەگى سايلاۋدا پارتيالارمەن قاتار، كوپتەگەن ازامات ءبىر مانداتتى وكرۋگتەن ءوزىن- ءوزى ۇسىنعانىن اتاپ ءوتتى.

«وسىلايشا، حالقىمىز ماڭىزدى وزگەرىسكە ءوز ۇلەسىن قوسۋعا دايىن ەكەنىن دالەلدەدى. ەلىمىزدە جاڭا ازاماتتىق، ساياسي مادەنيەت قالىپتاسىپ جاتىر. مەن سايلاۋعا بەلسەنە قاتىسقان بارشا ازاماتقا العىس ايتامىن»، - دەدى قاسىم جومارت توقايەۆ.

ايتا كەتەيىك، ەلوردادا مەملەكەت باسشىسى قاسىم- جومارت توقايەۆتىڭ قاتىسۋىمەن VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى ءوتىپ جاتىر.

اۆتور

ەسىمجان ناقتىباي