بريتاندىق دەپۋتات قازاقستانداعى سايلاۋ تۋرالى وي ءبولىستى

لوندون. قازاقپارات – ق ر پارلامەنتى ءماجىلىسى مەن ءماسليحاتتارىن سايلاۋدا ۇلى بريتانيا قاۋىمدار پالاتاسىنان باقىلاۋشى بولعان دەنيەل كاۆچينسكي قازاقستانعا ساپارى تۋرالى ءوز اسەرىمەن ءبولىستى، دەپ حابارلايدى قازاقپارات ءتىلشىسى.

قازاقستان جانە قازاقستاندىقتار تۋرالى

«بۇل - مەنىڭ قازاقستانعا العاشقى ساپارىم. مەن ءتۇرلى دىندەر مەن حالىقتاردى قۇرمەتتەيتىن وتە تولەرانتتى قوعامدى كوردىم. استانانىڭ قارقىندى دامۋىن، ءزاۋلىم عيماراتتار، بيزنەس- درايۆ، كوشەلەردىڭ تازالىعى، ۇيىمداستىرىلعان الەۋەتى جوعارى قوعامدى بايقادىم»، - دەدى بريتاندىق دەپۋتات لوندونعا ورالعاننان كەيىن.

«مەن وتە اقىلدى، تالعامپاز، جوعارى ءبىلىمدى، الەمگە اشىق، ديناميكالىق، ىسكەر ادامداردى كوردىم، ولار ايتارلىقتاي پايدالى قازبالار قورى بار ەلدە تۇرادى جانە ۇلى بريتانيا قازاقستاننىڭ ماڭىزدىلىعىن نەعۇرلىم تەزىرەك تۇسىنسە، سوعۇرلىم جاقسى»، - دەپ جالعاستىردى ول.

«پايدالى قازبالار مەن سيرەك كەزدەسەتىن مەتالداردىڭ قوماقتى قورىنا يە قازاقستان مەن موڭعوليا سياقتى ەلدەر بايلىعى جاعىنان جاڭا كۋۆەيت پەن ساۋد ارابياسى بولا الادى. سوندىقتان، قازاقستان جانە موڭعوليامەن بەرىك جانە ءوزارا سىيلاستىق قارىم- قاتىناستار قۇرۋ ءبىزدىڭ ۇكىمەت ءۇشىن وتە ماڭىزدى دەپ سانايمىن»، - دەيدى سپيكەر.

بايقاۋ كەزىندە ءتۇرتىپ العان وڭ تۇستار

قاۋىمدار پالاتاسىنىڭ دەپۋتاتى قازاقستانداعى سايلاۋدىڭ ۇيىمداستىرىلۋىنا ءتانتى بولدى جانە ول ءوزىنىڭ ەسەبىندە بريتاندىق پارلامەنتشىلەرگە بىرنەشە ۇسىنىستى قامتىماق.

«بىرىنشىدەن، سايلاۋ ۋچاسكەلەرىندە دارىگەرلەر مەن مەدبيكەلەر بولدى. قازاقستان ۇكىمەتى قارتتاردىڭ، جۇكتى ايەلدەردىڭ جانە باسقا دا وسال توپتاردىڭ سايلاۋ ۋچاسكەلەرىنە قاردى باسىپ كەلەتىنىن ەسكەرگەن. بىزدە مۇنداي جوق. بۇل - ءبىرىنشى ۇسىنىس»، - دەيدى ول.

«ەكىنشى ۇسىنىس - سايلاۋدى ادامداردىڭ داۋىس بەرۋگە ۋاقىتى بولۋى ءۇشىن جەكسەنبى كۇنى وتكىزۋ. بىزدە سايلاۋ بەيسەنبىدە وتەدى. ادامدار جۇمىستا، سول سەبەپتى ۋاقىت تاپپاي كۇيزەلەدى. جۇمىس كۇنى ولاردىڭ تۇرمىستىق ماسەلەلەرى بار جانە داۋىس بەرۋ ءارقاشان قولايلى بولا بەرمەيدى»، - دەدى دەنيەل كاۆچينسكي.

«كەيبىر سايلاۋ ۋچاسكەلەرىندە مۋزىكا ويناپ تۇردى، بۇل حالىققا سايلاۋدى جاعىمدى ەتىپ كورسەتەدى. مەن سونداي- اق، ءماسليحاتتار مەن پارلامەنتتىڭ تومەنگى پالاتاسىنا سايلاۋعا قاتىسقان تاۋەلسىز كانديداتتاردىڭ كوپتىگىنە تاڭقالدىم. وعان ايەلدەر، جاستار جانە ت. ب. كوپتەپ قاتىستى»، - دەدى بريتاندىق پارلامەنتشى.

سايلاۋ مەن پرەزيدەنت توقايەۆتىڭ رەفورماسىن باعالاۋ

«پرەزيدەنت توقايەۆ - حالىقارالىق دەڭگەيدە جوعارى قۇرمەتكە يە، وتە تاجىريبەلى ديپلومات. ول پرەزيدەنت پەن پارلامەنت اراسىنداعى جۇيەنى قايتا قۇرۋعا ارنالعان رەفورمالاردى جۇزەگە اسىرىپ جاتىر»، - دەدى دەنيەل كاۆچينسكي.

«مەنىڭ ويىمشا، سايلاۋ ءادىل ءارى اشىق ءوتتى. ءار ۋچاسكەدەن پروتسەستى باقىلايتىن 20 نەمەسە 25 بايقاۋشىنى كوردىم. بىزدە ونداي جوق. بۇل كەرەمەت دەپ ويلادىم. مەن قازاقستاندا سايلاۋ كوپتەگەن باتىس ەلدەرىندە كورگەنىمنەن الدەقايدا جاقسى وتكىزىلەدى دەپ ايتار ەدىم. قازاقستان قىسقا ۋاقىت ىشىندە ۇزاق جولدان ءوتتى»، - دەپ ەسەپتەيدى پارلامەنتشى.

«ايتپاقشى، ءاربىر سايلاۋ ۋچاسكەسىندە قازاقستاننىڭ تۋى مەن ەلتاڭباسى بولدى. بىزدە ول جوق. مەنىڭ ويىمشا، ادامدار سايلاۋدىڭ ماڭىزدىلىعىن سەزىنۋى ءۇشىن مەملەكەتتىك تۋ مەن ەلتاڭبانىڭ بولۋى وتە ماڭىزدى»، - دەدى قاۋىمدار پالاتاسىنىڭ دەپۋتاتى.

«ءبىراق، مەن ءۇشىن ەڭ اسەرلى ءسات سايلاۋ ۋچاسكەسىنىڭ جۇمىسى اياقتالعاننان كەيىن جينالعانداردىڭ بارلىعى قازاقستاننىڭ مەملەكەتتىك ءانۇرانىن شىرقاعانى بولدى. ءانۇراننىڭ سوزدەرى وتە ءوتىمدى جانە ادامدار ونى زور قۇرمەتپەن شىرقادى. مەن مۇندايدى بۇرىن- سوڭدى كورمەگەن ەدىم، بۇل ماعان قاتتى اسەر ەتتى»، - دەپ قورىتىندىلادى دەنيەل كاۆچينسكي.

اۆتور

سماعۇلوۆا ەركەجان