تۇركيا مەن يتاليادان كەلگەن بايقاۋشىلار سايلاۋعا قاتىستى پىكىر ءبىلدىردى

استانا. قازاقپارات - تۇركيا، سەربيا جانە يتاليادان كەلگەن بايقاۋشىلار قازاقستانداعى سايلاۋعا قاتىستى پىكىر ءبىلدىردى. حالىقارالىق بايقاۋشىلار داۋىس بەرۋ زاڭ تالاپتارىنا سايكەس ءجۇرىپ جاتقانىن ايتتى، دەپ حابارلايدى قازاقپارات ءتىلشىسى.

«سايلاۋ ۋچاسكەلەرىندە رەگلامەنتتىڭ، راسىمدەردىڭ ورىندالۋى بارىسىنا ەرەكشە ءمان بەردىم. تۇسكە دەيىن بىرنەشە سايلاۋ ۋچاسكەسىندە بولدىم. وسى ورايدا زاڭناما تالاپتارىن بۇزۋ دەرەكتەرى انىقتالماعانىن ايتا الامىن. سايلاۋدى ۇيىمداستىرۋ دەڭگەيى وتە جاقسى»، - دەدى حالىقارالىق ساياسات جانە ەكونوميكا ينستيتۋتىنداعى ەۋرازيالىق زەرتتەۋلەر ورتالىعىنىڭ (سەربيا) باسشىسى دۋشان پروروكوۆيچ ەلورداداعى حالىقارالىق بايقاۋشىلارعا قولعابىس كورسەتۋ ورتالىعىندا وتكەن بريفينگىدە.

سونىمەن قاتار «ەۋرازيا» گەوساياسي زەرتتەۋلەر جۋرنالىنىڭ (يتاليا) ۇيلەستىرۋشىسى ستەفانو ۆەرنولە استاناداعى ءۇش سايلاۋ ۋچاسكەسىنە بارعانىن جانە سايلاۋشىلاردىڭ داۋىس بەرۋ پروتسەسىنە قاتىسۋى قارقىندى ەكەنىن ايتتى.

بۇدان بولەك، «Marmara group» قورىنىڭ (تۇركيا) باسشىسى دوكتور مەحمەت اككان سۋۆەر قازاقستاندا دەپۋتتاردى سايلاۋ پروتسەسى دەموكراتيالىق قاعيدالارعا سايكەس ءوتىپ جاتقانىن ايتتى.

«تاڭەرتەڭگى سۋىققا قاراماستان، قالاداعى 10- سايلاۋ ۋچاسكەسىنە باردىم. داۋىس بەرۋگە جانە ەلدىڭ ساياسي ومىرىنە قاتىسىپ، ءوز جاۋاپكەرشىلىگىن سەزىنىپ وتىرعان ادامداردى كوپ كەزدەستىردىم. بۇل جاعداي قازاقستاننىڭ دەموكراتيانى ىلگەرىلەتۋدەگى ايقىن قادامىن بايقاتىپ وتىر. اسىرەسە، سايلاۋعا كەلىپ جاتقان جاستار وزدەرىنىڭ ۇستانىمىن ءبىلدىرىپ، ەلدىڭ بولاشاعىنا ەلەۋلى ۇلەسىن قوسىپ وتىر»، - دەدى مەحمەت اككان سۋۆەر.