ەلىمنىڭ، بالالارىمنىڭ بولاشاعى ءۇشىن داۋىس بەردىم - وليمپيادا چەمپيونى ولگا رىپاكوۆا

وسكەمەن. قازاقپارات - وليمپيادا چەمپيونى ولگا رىپاكوۆا سايلاۋدا ءوز تاڭداۋىن جاسادى، دەپ حابارلايدى قازاقپارات ءتىلشىسى.

وليمپيادا چەمپيونى، ەل ماقتانىشى ولگا رىپاكوۆا قازاقستاندا ءوتىپ جاتقان بارلىق سايلاۋلار مەن رەفەرەندۋمدارعا قاتىسىپ كەلەدى. وسىلايشا ول ءوزىنىڭ بەلسەندى ازاماتتىق ۇستانىمىن كورسەتۋدە. سپورتشى بۇگىن ءوتىپ جاتقان پارلامەنت ءماجىلىسى مەن بارلىق دەڭگەيدەگى ءماسليحات دەپۋتاتتارىنىڭ كەزەكتەن تىس سايلاۋىنان دا شەت قالعان جوق.

ولگا رىپاكوۆا وسكەمەن قالاسىنداعى 47№ ورتا مەكتەپتە ورنالاسقان 2№ سايلاۋ ۋچاسكەسىندە داۋىس بەردى.

«بۇل مەنىڭ ەل ازاماتى رەتىندەگى مىندەتىم. ەلىمنىڭ، بالالارىمنىڭ بولاشاعى ءۇشىن داۋىس بەردىم. بالالارىم ءوز وتانىندا ءومىر ءسۇرىپ، وسىندا وقىپ جانە جۇمىس ىستەيتىن بولادى، - دەدى وليمپيادا چەمپيونى.

ءوز سوزىندە ول بيۋللەتەننىڭ كوپتىگىنە قاراماستان، ءبارى قاراپايىم جانە تۇسىنىكتى بولعانىن، داۋىس بەرۋ پروتسەسىندە ەشقانداي قيىندىق تۋىنداماعانىن جەتكىزدى.

ەسكە سالساق، وسىعان دەيىن وسكەمەندەگى سايلاۋ ۋچاسكەسىنەن فوتورەپورتاج بەرگەن ەدىك.