اراق-شاراپتان باس تارتقان ماڭعىستاۋ وبلىسىنداعى اۋىل سايلاۋ كۇنى دە ەرەكشەلەندى - فوتو

اقتاۋ. قازاقپارات - ماڭعىستاۋ وبلىسىنداعى باياندى اۋىلىنىڭ تۇرعىندارى سايلاۋ ۋچاسكەلەرىنە جاپپاي قازاقتىڭ ۇلتتىق كيىمىمەن كەلۋدە.

ەر ازاماتتار يىعىنا ويۋلى شاپاندارىن جاپسا، قىز-كەلىنشەكتەر كاجەكەي، قامزولىن كيىپ، ساياسي شارانىڭ ءسانىن كەلتىردى، دەپ حابارلايدى قازاقپارات mangystaumedia.kz-كە سىلتەمە جاساپ.

داۋىس بەرۋگە ۇلتتىق كيىم كيىپ بارۋدى اۋىلدىڭ اق جاۋلىقتى انالارى كوتەرگەن. بۇل يدەيانى اۋىل جۇرتشىلىعى جىلى قابىلداپ، كوپشىلىكتەن قولداۋ تاپتى.

«قاراڭىزدارشى قانداي ادەمى، بارىنە جاراسىپ تۇر. اتا-بابالارىمىزدان مۇرا بولىپ جەتكەن اسىل قازىنالارىمىزدىڭ ءبىرى - ويۋ- ورنەكتى ۇلتتىق كيىم كيۋ - ەستەتيكالىق ءسان عانا ەمەس، حالقىمىزدىڭ مول تاعىلىمدى ۇلاعاتىن، ونەگەلى ءتالىم-تاربيەسىن، باي ۇلتتىق بولمىسىمىزدى ناسيحاتتاۋ بولىپ تابىلادى. وسىنى جاستاردىڭ ساناسىنا ءسىڭىرۋ عوي باستى ماقسات»، - دەيدى اۋىلداعى اجەلەر كەڭەسىنىڭ ءتورايىمى اقكۇمىس دۇيسەنبايەۆا.

8 مىڭنان استام تۇرعىنى بار باياندى اۋىلىندا 4406 سايلاۋشى تىركەلگەن. ولار ورتا مەكتەپكە ورنالاسقان قوس سايلاۋ ۋچاسكەسىندە ءوز تاڭداۋىن جاساپ جاتىر. سايلاۋ ۋچاسكەلەرىندە قازاقتىڭ كۇيلەرى كۇمبىرلەپ، تۇرعىنداردىڭ ۇلتتىق رۋحىن كوتەرە تۇسكەندەي.

«ۇلتتىق بولمىسىمىزدى ساقتاپ قالۋ - ۇلتتىق تاربيەدەن باستالادى عوي. وسىدان 1 اي بۇرىن اۋىل تۇرعىندارى بولىپ ىشىمدىكتەن باسى ءبۇتىن باس تارتتىق. اتقارۋشى بيلىك، قۇقىق قورعاۋ ورگاندارى مەن اۋىل كاسىپكەرلەرى وكىلدەرى الكوگول ونىمدەرىن ساتۋعا جانە ساتىپ الۋعا جول بەرمەۋ بويىنشا ءوزارا ىنتىماقتاستىق تۋرالى مەموراندۋمعا قول قويدىق. بۇل قادام قىلمىستىڭ ازايۋىنا كومەكتەسەدى دەپ ۇمىتتەنەمىز. ءقازىر اۋىل تىنىش. جاستار پايدالى ىستەرمەن اينالىسۋدا»، - دەدى اۋىل اكىمى داستان مۇراتاليەۆ.