ناۋرىز مەرەكەسى: اسكەري قىزمەتكەرلەر توعىزقۇمالاق چەمپيوناتىندا باق سىنادى
بۇل تۋرالى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ حابارلايدى.
سپورت كوميتەتى - ورتالىق سپورت كلۋبى جارىستى ەكى توپتا ۇيىمداستىردى. العاشقى توپتا قورعانىس مينيسترلىگى مەن باس شتاب دەپارتامەنتتەرىنىڭ، باسقارمالارىنىڭ، ورتالىقتارىنىڭ، ەكىنشى توپتا قارۋلى كۇشتەر باس باسقارمالارىنىڭ (باسقارمالارىنىڭ)، اسكەري بولىمدەرى مەن مەكەمەلەرىنىڭ وكىلدەرى سايىسقا ءتۇستى.
چەمپيوناتقا بارلىعى 70 كە جۋىق اسكەري قىزمەتشى مەن قىزمەتكەر قاتىستى. ايتا كەتەرلىگى، ءتورت مىڭ جىل بۇرىن پايدا بولعان ەجەلگى ۇستەل ويىنى ونەرىندە ءۇندىستاننان كەلگەن ۇلتتىق قورعانىس ۋنيۆەرسيتەتىنىڭ وقىتۋشىسى پودپولكوۆنيك شينا گوەل مەن قىرعىزستاندىق ماگيسترانت پولكوۆنيك رينات مۇقامبەتوۆ تە ءوز كۇشتەرىن سىناپ كوردى.
«توعىزقۇمالاقتان جارىس وتكىزۋ ءبىزدى تاپقىرلىقپەن، كورەگەندىكپەن جانە توزىمدىلىكپەن ەرەكشەلەنەتىن اتا-بابا داستۇرىنە داعدىلاندىرادى. بۇل قاسيەتتەر كۇندەلىكتى ومىردە دە، قىزمەتتە دە كۇش بەرەدى»، - دەپ اتاپ ءوتتى قورعانىس مينيسترلىگى اپپاراتىنىڭ باسشىسى، پولكوۆنيك ەربول قۇماربەك ۇلى.
كوماندالىق ەسەپتە ءبىرىنشى توپتاعى «التىندى» جاۋىنگەرلىك دايارلىق دەپارتامەنتىنىڭ سپورتشىلارى جەڭىپ السا، ەكىنشى توپتا 14776 اسكەري ءبولىمىنىڭ قۇراماسى ۇزدىك اتاندى.
ورتالىق اپپارات توبىنداعى جەكە بىرىنشىلىكتە ەرلەر اراسىندا گەواقپاراتتىق قامتاماسىز ەتۋ دەپارتامەنتىنىڭ وكىلى، 3-سىنىپتى سەرجانت شالقار ءىلياسوۆ، ايەلدەر اراسىندا جاۋىنگەرلىك دايارلىق دەپارتامەنتىنىڭ وكىلى، كىشى سەرجانت داۋرەنگۇل نۇرلان قىزى جوعارى ونەر كورسەتتى.
باسقارمالار مەن اسكەري بولىمدەر توبىندا ەرلەر اراسىندا اسكەري پوليتسيا باس باسقارماسىنىڭ وكىلى، قاتارداعى جاۋىنگەر ايتىم ەراسىل، ايەلدەردە اراسىندا 14776 اسكەري ءبولىمىنىڭ وكىلى، مايور زاميرا بەكمۇراتوۆا ۇزدىك ناتيجە كورسەتتى.
ەلوردالىق دەسانتتىق-شابۋىلداۋ بريگاداسىنىڭ سپورتشىسى، 3-سىنىپ سەرجانتى گۇلجان بولىسبايەۆا «جەڭىسكە دەگەن جىگەرى ءۇشىن» نوميناتسياسىندا ماراپاتتالدى.
جارىسقا بەلسەندى قاتىسقانى ءۇشىن ۇلتتىق قورعانىس ۋنيۆەرسيتەتى مەن قارۋلى كۇشتەر مەملەكەتتىك اسكەري- تاريحي مۇراجايىنىڭ كوماندالارىنا، سونداي-اق وقىتۋشى شينا گوەل مەن ماگيسترانت رينات مۇقامبەتوۆكە گراموتالار تابىستالدى.
