تالدىقورعان قالاسىنىڭ باس جوسپارى وزگەرتىلەدى

تالدىقورعان. قازاقپارات - جەتىسۋ وبلىسىنىڭ ورتالىعى تالدىقورعان قالاسىنىڭ باس جوسپارىنا تۇزەتۋلەر ەنگىزىلمەك، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

تالدىقورعاندا قازىر 200 مىڭنان استام ادام تۇرادى. قولدانىستاعى باس جوسپار 2017 -جىلى حالىق سانى 156 مىڭ بولعان كەزدە بەكىتىلگەن.

جالپى، قالادا ەكى تۇرعىن اۋداننىڭ - قاراتال وزەنىنىڭ وڭ جاعالاۋى مەن وڭتۇستىك- باتىس تۇرعىن اۋدانىنىڭ 2-كەزەڭىنىڭ دامۋىنا قاراي حالىق سانى وسە تۇسەدى دەگەن بولجام بار.

تالدىقورعان قالاسى اكىمدىگىنىڭ مالىمەتىنشە، قالانى دامىتۋ بارىسىندا قاراتال وزەنىنىڭ وڭ جاعالاۋىندا 174 گ ا اۋماققا 85 ءۇي، 2 مەكتەپ، 6 بالاباقشا جانە 1 وڭالتۋ ورتالىعىن سالۋ كوزدەلگەن. قازىرگى كەزدە بولجالدى قۇنى 14,5 ميلليارد تەڭگە بولاتىن 1350 پاتەرلىك 28 ءۇي جوبالانىپ جاتىر. مەملەكەتتىك ساراپتاما ناتيجەلەرى تامىز ايىندا شىعۋى ءتيىس، ال جوبالاردى ىسكە اسىرۋ 2024-2025 -جىلدارعا جوسپارلانعان.

اۋدانى 104,5 گ ا بولاتىن وڭتۇستىك- باتىس تۇرعىن اۋدانىندا 73 جاڭا ءۇي، 2 مەكتەپ، 2 بالاباقشا مەن 2 ەمحانا سالۋ جوسپاردا بار. الدىن الا ەسەپتەۋلەر بويىنشا قۇنى 13,5 ميلليارد تەڭگە بولاتىن 1215 پاتەرگە ارنالعان 26 ءۇي جوبالانا باستادى. قۇرىلىس جۇمىستارى 2023-2024 -جىلدارى جۇرگىزىلەدى. سونداي- اق، قۋاتتىلىعى ساعاتىنا 49 گكال بولاتىن، 15 مىڭ ادامدى قامتيتىن قازاندىق سالۋ جوبالانىپ وتىر. قۇرىلىستىڭ بولجالدى قۇنى - 7 ميلليارد تەڭگە، ساراپتاما ناتيجەلەرى وسى جىلدىڭ ماۋسىم ايىندا الىنادى.

ينجەنەرلىك ينفراقۇرىلىمدى دامىتۋ بويىنشا قالا كوشەلەرى ۇزارا تۇسپەك. وڭتۇستىك- باتىس تۇرعىن اۋدانىن دامىتۋدىڭ 1-كەزەڭىندە قۇنى 3 ميلليارد تەڭگە بولاتىن، ۇزىندىعى 5,5 شاقىرىمدىق 9 كوشە سالۋ كوزدەلگەن. 2021-2022 -جىلدارى 2,4 ك م نەمەسە 4 كوشە سالىنسا، بيىل 2 كوشە نەمەسە 1 ك م جول سالۋ جوسپارلانعان. جوبا 2024 -جىلى اياقتالۋى ءتيىس.

جالپى، قالادا جول ينفراقۇرىلىمىنا قاتىستى جالپى قۇنى 15,1 ميلليارد تەڭگە بولاتىن 7 جوبا ىسكە اسىرىلادى، ياعني ۇزىندىعى 103 ك م كوشە قامتىلادى. سونىڭ ىشىندە 3 جوبا 2021 -جىلى باستالعان، ولار 2024 -جىلى اياقتالادى، سونداي- اق 4 جوبا كۇردەلى جوندەۋگە قاتىستى، بۇگىنگى كۇنى مەردىگەردى انىقتاۋ كونكۋرستىق راسىمدەرى ءجۇرىپ جاتىر.

وسى جىلى جاڭادان 18,3 ك م بولاتىن 34 كوشە سالىپ، 104 كوشەنىڭ 46,3 شاقىرىمىنا كۇردەلى جانە ورتاشا جوندەۋ جاساۋ جوسپارلانعان. جاڭا قۇرىلىستار «جاستار-1»، «سولتۇستىك- باتىس» جانە 8, 9-شاعىن اۋدانداردا، ال جوندەۋ جۇمىستارى «وڭتۇستىك- شىعىس» جانە «شىعىس» تۇرعىن اۋداندارىندا، وتەناي مەن ەڭبەك اۋىلدارىندا جوسپارلانعان. وعان قوسا، «شايقورعان»، «جاستار-2»، 3-بولىمشە، كوكتال اۋىلى مەن «پلودوپيتومنيك» تۇرعىن اۋداندارىندا دا ءبىرقاتار جوبا قولعا الىنادى.

گازداندىرۋ جۇمىستارى دا جالعاسادى. 2016 -جىلدان باستاپ تالدىقورعاندا 921,5 ك م جەلى سالىنعان، حالىقتىڭ % 90,3- ى كوگىلدىر وتىنعا قوسىلۋعا مۇمكىندىك الىپ، % 57,3- ى گاز قوستىردى. 2022 -جىلدان بەرى «جاستار-2» جانە ىنتىماق تۇرعىن ءۇي اۋدانىنداعى 3 مىڭعا جۋىق ءۇيدى قامتيتىن 2 جوبا ىسكە اسىرىلىپ جاتىر.

بيىل 2 نىساننىڭ قۇرىلىسى باستالادى. اتاپ ايتقاندا، قالانىڭ قالعان ۋچاسكەلەرىندە جانە مويناق اۋىلىندا جەلىلەر تارتىلادى. تابيعي گازبەن ءالى قامتىلماعان 4 مىڭعا جۋىق ۋچاسكە بار، ولار: قاراتال، قىزىل تاس، مەرەكەلىك، بالىقتى، سارىبۇلاق، المالى، اشىبۇلاق ساياجاي قاۋىمداستىقتارى. بۇل ۋچاسكەلەردى جوبالاۋ وسى جۇزەگە اسۋى ءتيىس.

وبلىس ورتالىعىن اباتتاندىرۋ ماقساتىندا 2 جاڭا سكۆەر سالۋ جوسپارلانعان.

رەداكتور

گۇلنۇر عازيز قىزى