بۇگىن ساياسي پارتيا وكىلدەرى اراسىندا سايلاۋالدى دەبات وتەدى
پىكىرسايىسقا «Amanat» ساياسي پارتياسىنان - ەرلان قوشانوۆ، «اۋىل» حالىقتىق دەموكراتيالىق پاتريوتتىق پارتياسىنان جيگۋلي دايرابايەۆ، «Respulica» پارتياسىنان - ايداربەك قوجانازاروۆ، قازاقستان حالىق پارتياسىنان - وكسانا اۋباكىروۆا، قازاقستاننىڭ «بايتاق» جاسىلدار پارتياسىنان - ازاماتحان امىرتايەۆ، «اق جول» قازاقستان دەموكراتيالىق پارتياسىنان - ازات پەرۋاشەۆ، ال جالپىۇلتتىق سوتسيال- دەموكراتيالىق پارتياسىنان نۇرلان اۋەسبايەۆ قاتىسادى.
تەلەۆيزيالىق پىكىرسايىس رەگلامەنت بويىنشا ءۇش راۋندتان تۇرادى. ءبىرىنشى راۋندتىڭ ءوزى ەكى تۋرعا بولىنگەن.
العاشقىسىندا قاتىسۋشىلار ءوز پارتياسىن تانىستىرادى. اتاپ ايتقاندا، پارتيانىڭ ماقسات-مۇراتى، ساياسي كەڭىستىكتەگى ورنى مەن حالىقتىڭ تۇرمىس-تىرشىلىگىن قالاي جاقسارتاتىنى تۋرالى مالىمەت بەرەدى.
2 مينۋتتا تانىستىرىپ ۇلگەرۋى ءتيىس. ءبىرىنشى راۋندتىڭ ەكىنشى تۋرىندا قاتىسۋشىلار قارسىلاستارىنا وتكىر، وزەكتى سۇراق قويا الادى.
ەكىنشى راۋند «قازاقستاننىڭ الەۋمەتتىك- ەكونوميكالىق دامۋى» دەپ اتالادى. ول دا ەكى تۋرعا بولىنگەن.
ءبىرىنشى تۋردا قاتىسۋشىلار وزدەرىنىڭ سايلاۋالدى باعدارلاماسى اياسىندا قازاقستاندى الەۋمەتتىك- ەكونوميكالىق جاعىنان قالاي دامىتاتىنى تۋرالى ايتادى. وعان دا 2 مينۋت ۋاقىت بەرىلەدى.
ال ەكىنشى تۋرىندا پارتيا وكىلدەرى «حابار» اگەنتتىگى ارنايى ۇيىمداستىرعان سall ورتالىققا كورەرمەننەن كەلىپ تۇسكەن ءبىر سۇراققا جاۋاپ بەرەدى.
ءۇشىنشى راۋندتا تەلەدەبات قاتىسۋشىلارى «سايلاۋشىلارعا ۇندەۋ» جاسايدى. ءار قاتىسۋشىعا 1,5 مينۋتتان ۋاقىت بەرىلەدى.
ايتا كەتەرلىگى، بۇعان دەيىن 7 ساياسي پارتيا وكىلدەرىنىڭ اراسىنداعى ءبىرىنشى پىكىرسايىس Qazaqstan ۇلتتىق تەلەارناسىنىڭ تىكەلەي ەفيرىندە وتكەن.
ال ەكىنشى پىكىرسايىس ك ت ك تەلەارناسىندا ۇيىمداستىرىلعان ەدى.
