قاراقالپاقستاندا قازاق حالقىنىڭ امال مەرەكەسى تويلاندى - فوتو

نوكىس. قازاقپارات - ءاجىنياز اتىنداعى نوكىس مەملەكەتتىك پەداگوگيكالىق ينستيتۋتىندا قازاق حالقىنىڭ ۇلتتىق مەرەكەلەرىنىڭ ءبىرى - امال مەرەكەسى نەمەسە كورىسۋ كۇنىنە ارنالعان «امال - جىلدىڭ جارشىسى» تاقىرىبىندا ادەبي-كومپوزيتسيالىق مەرەكەلىك كەش ءوتتى، دەپ حابارلايدى قازاقپارات.

وزبەكستان - كوپ ۇلتتى مەملەكەت. قازىرگى كەزدە ەلدە بىرلىگى جاراسقان 130 دان اسا ءتۇرلى ۇلت وكىلدەرى ءومىر سۇرۋدە.

ءاربىر ۇلت وكىلدەرى ناۋرىز مەرەكەسى قارساڭىندا ءوز حالقىنىڭ سالت-ءداستۇرى، ادەت-عۇرپىن پاش ەتەتىن مادەني، ادەبي ءىس-شارا ۇيىمداستىرۋدا.

ۇلىستىڭ ۇلى كۇنى، جاڭا جىل، جاڭا كۇننىڭ باستاۋى رەتىندە بەلگىلەنەتىن امال مەرەكەسى - كورىسۋ كۇنى تۋىسقان قازاق حالقىنىڭ اتا-بابالاردان مۇرا بولىپ كەلە جاتقان قۇندىلىقتارىنىڭ ءبىرى. بەرەكە مەن بىرلىكتىڭ سيمۆولى سانالعان بۇل مەرەكە كوپ ۇلتتى قاراقالپاقستان رەسپۋبليكاسىندا دا كەڭ تۇردە اتاپ وتىلەدى.

«امال مەرەكەسى نەمەسە كورىسۋ كۇنى - اعايىن-تۋىستىڭ تاتۋلىعى مەن حالىقتاردىڭ ىنتىماعىنىڭ ايقىن كورىنىسى»، - دەيدى ينستيتۋتتىڭ قازاق ءتىلى جانە ادەبيەتى كافەدراسىنىڭ مەڭگەرىشىسى، دوتسەنت ىرىستى قۇتتىمۇراتوۆا.

مەرەكەلىك كەشتە ينستيتۋتتىڭ جاستار ماسەلەلەرى جانە رۋحاني-اعارتۋشىلىق ىستەرى جونىندەگى ءبىرىنشى پرورەكتورى قۋاندىق قادىروۆ، قازاقستان رەسپۋبليكاسى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ادەبيەتى كافەدراسىنىڭ مەڭگەرۋشىسى، پروفەسسور قايىربەك كەمەڭگەر ءسوز سويلەدى. ءىس-شارادا قولونەر ۇلگىلەرى، ۇلتتىق تاعامدار، ۇلتتىق كيىمدەر كورمەسى ۇيىمداستىرىلىپ، تالانتتى ستۋدەنتتەردىڭ ورىنداۋىنداعى ءان-كۇي، بي، تۇساۋكەسۋ، بەتاشار سياقتى ساحنالىق كورىنىستەر كورەرمەندەر كوڭىلىنەن شىقتى.

يسلام ماتەكوۆ، ءاجىنياز اتىنداعى نوكىس مەملەكەتتىك پەداگوگيكالىق ينستيتۋتىنىڭ باسپا ءسوز حاتشىسى