اقمولا وبلىسىندا مۇز جارۋ جۇمىستارى باستالدى

كوكشەتاۋ. قازاقپارات - اقمولا وبلىسىندا سۋ تاسقىنى كەزەڭىنە دايىندىق اياسىندا مۇز جارۋ جۇمىستارى باستالدى، دەپ حابارلايدى قازاقپارات ءتىلشىسى.

«10-ناۋرىزدان باستاپ مەردىگەرلىك ۇيىمدار 10 اۋدان اۋماعىنداعى 15 وزەن ۋچاسكەلەرىندە 20 مىڭ شارشى مەتردەن استام الاڭدا مۇزدى السىرەتۋ بويىنشا جارىلىس جۇمىستارىن جۇرگىزۋدى باستادى. بارلىعى 869 مىڭ تەكشە مەتردەن استام قار شىعارىلدى، بۇل وتكەن جىلدىڭ سايكەس كەزەڭىمەن سالىستىرعاندا 40 پايىزعا كوپ. وڭىرلەردە 315 توننا جانار- جاعار ماي، 17 مىڭ توننا ينەرتتى ماتەريالدار قورى جاسالدى، 91 مىڭ قاپ دايىندالدى. اتالمىش جۇمىستار جالعاسۋدا»، - دەيدى اقمولا وبلىستىق ت ج د توتەنشە جاعدايلاردىڭ الدىن الۋ باسقارماسىنىڭ باستىعى ەردەن بەرلىبەكوۆ.

باسقارما باسشىسى اتاپ وتكەندەي، كوكتەمگى سۋ تاسقىنىنىڭ الدىن الۋ جۇمىستارىنىڭ ناتيجەسىندە ايماقتا سۋ باسۋ قاۋپى بار 128 ەلدى مەكەننىڭ 113-دە قاۋپ سەيىلدى. وتكەن جىلدىڭ جاز ايلارىندا 65 ەلدى مەكەندە (15 اۋدان، 3 قالا) سۋ تاسقىنىنا قارسى ءىس- شارالار وتكىزىلدى.

كوكتەمگى كەزەڭدەگى توتەنشە جاعدايدى جويۋ ماقساتىندا ازاماتتىق قورعاۋ ورگاندارى مەن قۇرالىمدارىنىڭ 2524 ادام، 1124 بىرلىك ارنايى تەحنيكا، 258 موتوپومپالار جانە 48 بىرلىك ءجۇزۋ قۇرالدارىنىڭ كۇشتەرى مەن قۇرالدارى تولىق دايىندىققا كەلتىرىلدى.

«ق ر ۇلتتىق ۇلانىنىڭ 5510 اسكەري ءبولىمىنىڭ كۇشتەرى مەن قۇرالدارىن قوسىمشا توپتاستىرۋ كوزدەلگەن، ونىڭ ىشىندە 60 ادام جانە 4 تەحنيكا بار. سونداي- اق، ت ج م بۇيرىعىنا سايكەس قاجەت بولعان كەزدە م. عابدۋللين اتىنداعى ازاماتتىق قورعاۋ اكادەمياسىنىڭ 11 قىزمەتكەرى مەن كۇندىزگى وقۋ فاكۋلتەتىنىڭ 50 كۋرسانتى جانە 5 ارنايى تەحنيكا جۇمىلدىرىلاتىن بولادى. كوكشەتاۋ قالاسىنىڭ اۋەجايىندا قازاۆياقۇتقارۋدىڭ م ي-171 تىكۇشاعى كەزەكشىلىكتە تۇر ، - دەپ قوستى ەردەن بەرلىبەكوۆ.

وسى رەتتە، سۋ تاسقىنى جاعدايى كۇردەلەنە تۇسكەن اۋداندارعا وزگە ايماقتارداعى ت ج د كۇشتەرى مەن قۇرالدارىن باعىتتاۋ جوسپارلانىپ وتىر.