قازاقستان اۋماعىنىڭ جارتىسىنان استامىندا قار جاتىر

استانا. قازاقپارات - وڭىرلەردەگى ىقتيمال سۋ تاسقىنى جاعدايىن باعالاۋ ءۇشىن قازاقستاننىڭ قار جامىلعىسىنىڭ كارتاسى پايدالانىلادى.

كارتانى «قازگيدرومەت» ر م ك جەدەل عارىش مونيتورينگى دەرەكتەرىنە سۇيەنە وتىرىپ جاسايدى، دەپ حابارلايدى قازاقپارات.

كارتانى جاساۋ كەزىندە قازگيدرومەت قار جامىلعىسىنىڭ اۋدانىن ايماقتىڭ جالپى اۋماعىنىڭ پايىزىمەن باعالايدى.

بۇل قاردىڭ قاي جەردە بەلسەندى ەرىپ جاتقانىن باعالاۋعا جانە ەرىگەن سۋىنان ەلدى مەكەندەردى سۋ باسۋ قاۋپىن انىقتاۋعا مۇمكىندىك بەرەدى.

سونىمەن قاتار، كارتادا كورسەتىلگەن وزەن باسسەيندەرى مەن ءىرى سۋ قويمالارىنىڭ سۋ جىبەرۋ الاڭدارى وزەندەردەگى سۋ شىعىنىنىڭ ۇلعايۋ پروتسەستەرى قاي جەردە جانە قاشان باستالاتىنىن جانە ولار ارقىلى ەرىگەن قار سۋىنىڭ ۇلكەن اعىنى قاۋپى قايدا تومەندەگەنىن باعالاۋعا مۇمكىندىك بەرەدى.

ماسەلەن، 2023-جىلعى 8- ناۋرىزداعى مالىمەت بويىنشا ماڭعىستاۋ، قىزىلوردا، اتىراۋ وبلىستارىندا قار جوق.

تۇركىستان، جامبىل وبلىستارىنداعى شاعىن تاۋلى ايماقتاردا قار جوق دەۋگە بولادى.

الماتى، جەتىسۋ، باتىس قازاقستان جانە اقتوبە وبلىستارىندا قار بەلسەندى ەرىپ جاتىر.

اقتوبە وبلىسىنداعى ساعىز جانە ەمبى وزەندەرىنىڭ باسسەيندەرىندە قاردىڭ ەرۋى اتىراۋ وبلىسىنداعى وسى وزەندەردە سۋ شىعىنى ۇلعايا باستايتىنىن بىلدىرەدى.