15:58, 09 - ناۋرىز 2023 | GMT +6
قازاقستاندا مەكتەپ وقۋلىقتارىن كىم جازادى
استانا. قازاقپارات - وقۋ-اعارتۋ مينيسترلىگىنىڭ مالىمەتىنشە، ەلىمىزدە وقۋلىق ازىرلەۋ جانە باسىپ شىعارۋ جۇمىسى باسەكەلى ورتاعا بەرىلگەن.
وسىعان سايكەس قازىرگى ۋاقىتتا وقۋ ادەبيەتتەرىن اۆتورلىق ۇجىمى قالىپتاسقان باسپا ۇيلەرى ازىرلەيدى، دەپ حابارلايدى قازاقپارات.
دايىن وقۋ ادەبيەتتەرى ق ر وقۋ-اعارتۋ مينيسترلىگى رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنان مەملەكەتتىك ساراپتامادان، بارلىق كەزەڭىنەن وتكەن وقۋلىقتار عانا ماقۇلدانادى.
اۆتورلار توبىن باسپا ۇيلەرى كاسىبي ءبىلىمى، بىلىكتىلىگى مەن ءبىلىم بەرۋ ۇيىمدارىنداعى جۇمىس تاجىريبەسى بار، وقۋلىقتاردى ازىرلەۋ بويىنشا وقىتۋ كۋرستارىنان وتكەن تۇلعالار اراسىنان جاساقتايدى.
مەكتەپ وقۋلىعى اۆتورلارىنىڭ قۇرامىندا مىندەتتى تۇردە كەمىندە 1 عالىم جانە 2 پراكتيك-مۇعالىم بولۋى ءتيىس.
اۆتورلار وقۋ ادەبيەتىن جالپىعا مىندەتتى ءبىلىم بەرۋ ستاندارتى جانە ءتيىستى پاندەرگە ارنالعان ۇلگىلىك وقۋ باعدارلامالارى نەگىزىندە جازادى.
