جەتىسۋ وبلىسىندا بىرنەشە اۋلا مەن كوشەنى تاسقىن سۋ باستى - ۆيدەو

تالدىقورعان. قازاقپارات - جەتىسۋ وبلىسىندا ەرىگەن قار سۋى بىرنەشە ءۇيدىڭ اۋلاسى مەن كوشەنى باسىپ قالدى، دەپ حابارلايدى قازاقپارات ءتىلشىسى وڭىرلىك توتەنشە جاعدايلار دەپارتامەنتىنە سىلتەمە جاساپ.

«5-ناۋرىزدا اۋا تەمپەراتۋراسىنىڭ 15+ گرادۋس دەيىن كوتەرىلۋىنەن قاردىڭ جىلدام ەرۋىنە بايلانىستى جەتىسۋ وبلىسى كەربۇلاق اۋدانىنىڭ قىزىلجار اۋىلىندا اۋىلدىڭ شىعىس بولىگىندە ورنالاسقان ەگىستىكتەردەن ەرىگەن قار سۋى اعىلدى. ارىق جۇيەسى تاسقىن سۋ كولەمىنە توتەپ بەرە الماي، سۋ شىنىبەك كوشەسىن باسىپ قالدى، 4 اۋلا اۋماعى سۋ استىندا قالدى.

قازا بولعاندار، زارداپ شەككەندەر، سونداي-اق تۇرعىن ۇيلەردى سۋ باسۋ فاكتىلەرى تىركەلگەن جوق. قازىرگى ۋاقىتتا جاعداي تۇراقتى، سۋ دەڭگەيى تومەندەدى. ەرىگەن سۋ ترانزيتتىك رەجيمدە بايعازى وزەنىنە كەتۋدە»، - دەلىنگەن تاراتىلعان حابارلامادا.

قازىر جەرگىلىكتى اتقارۋشى ورگانداردىڭ، جەتىسۋ وبلىستىق توتەنشە جاعدايلار دەپارتامەنتىنىڭ جانە جەرگىلىكتى تۇرعىنداردىڭ (66 قىزمەتكەر جانە 11 تەحنيكا) كۇشىمەن ارىق جۇيەسىن تەرەڭدەتۋ، تازارتۋ، ينەرتتى ماتەريالدارى بار قاپشىقتار دايىنداۋ جۇرگىزىلىپ جاتىر. سونداي-اق تاسقىن سۋدى ەگىستىكتەردەن شىعارۋ ءۇشىن ارنالار قازىلىپ جاتىر.

«قازگيدرومەت» ر م ك ەسكەرتۋىنە سايكەس، 6-8-ناۋرىز ارالىعىندا كۇننىڭ كۇرت جىلىنۋىنا بايلانىستى جەتىسۋ وبلىسىندا قار جىلدام ەرىپ تاسقىن سۋ قالىپتاسادى، تاۋ بەتكەيلەرىنەن ەرىگەن قار سۋى اعىپ، وزەن- كولدەردە مۇز السىرەيدى، سۋ دەڭگەيى كوتەرىلىپ، ارناسىنان تاسيدى.

«وسىعان بايلانىستى تۇرعىنداردى ۇيلەرىنە ىرگەلەس ورنالاسقان ارىق جەلىلەرى مەن قۇبىرلى وتكەلدەردى قاردان، مۇزدان جانە قوقىستان تازارتۋ شارالارىن قابىلداۋعا شاقىرامىز»، - دەيدى جەتىسۋ وبلىسى ت ج د باسپا ءسوز قىزمەتىنەن.